Ҳизби сотсиал-демократии Тоҷикистон (ҲСДТ) ба интихоботи санаи 1-уми март таъиншуда ба Маҷлисҳои вакилони халқи вилоят, шаҳру ноҳия ва маҷлисҳои ҷамоат ягон номзад пешбарӣ накард.
Раиси ҲСДТ Раҳматилло Зойиров ба «Азия-Плюс» дар ин робита иттилоъ дод, ки сабаби аз ширкат дар интихоботи маҷлисҳои маҳаллӣ даст кашидани ҳизб дар он аст, ки интихобот комилан зери назорати ҳукуматдорони маҳаллӣ ҷараён дошта, чунин таҷриба аллакай тӯли солҳои зиёд мавриди амал қарор дорад.
«Дар интихоботи моҳи феврали соли 2010 ҲСДТ талош варзид, ки ба ҳайати маҷлисҳои вакилони халқи баъзе шаҳру ноҳияҳо намояндаи худро шомил созад, вале таҷриба нишон дод, ки он ҷо амалҳои ҳукуматдорони маҳаллӣ умуман назорат намешавад ва дар интихоботи соли 2015 мо тасмим гирифтем, ки асабҳоямонро эҳтиёт намуда, вақтро ҳам беҳуда сарф накунем», – гуфт раиси ҲСДТ.
Дар идома ӯ қайд кард, ки комиссияҳои интихоботии чанде аз шаҳру ноҳияҳо, аз ҷумла шаҳри Душанбе ҷиҳати пешбарӣ намудани номзадҳои худ ба маҷлисҳои маҳаллӣ ба ҲСДТ муроҷиат кардаанд.
«Мо ба онҳо изҳор доштем, ки то замони ба ҳайати комиссияҳои интихоботии қитъавӣ роҳ дода нашудани узвияти намояндагони аҳзоби сиёсӣ, ҲСДТ аз иштирок дар интихобот ба маҷлисҳои маҳаллӣ даст мекашад», – афзуд Р.Зойиров.
