Тумани ғализе, ки имрӯз фазои шаҳри Душанберо фаро гирифт, ба ҷадвали парвози ҳавопаймоҳо аз Фурудгоҳи байнулмилалии Душанбе (ФБД) тағйирот ворид намуд.
Сухангӯи ФБД Муҳаммадюсуф Шодиев ба «Азия-Плюс» дар ин робита изҳор намуд, ки дар робита ба туман айни замон парвози се ҳавопаймо аз Душанбе ба Маскав ба таъхир афтодааст.
«Мусофирони хатсайрҳои зикршуда дар дохили ҳавопаймоҳо қарор дошта, тасмими парвоз аз ҷониби раҳбари сарнишинони тайёра қабул мешавад», – гуфт Шодиев.
Зимнан зикр гардид, ки, ба нишастани ҳавопаймоҳо ба фурудгоҳи Душанбе туман ҳеҷ монеъае эҷод намекунад.
Тибқи маълумоти обуҳавошиносон, туман дар фазои минтақаи ФБД тақрибан то соати 10:30-11:00 боқӣ хоҳад монд. Мизони биноӣ дар минтақаи ФБД айни замон 200 метрро ташкил медиҳад.
