Муовини нахуствазири Тоҷикистон Азим Иброҳим рӯзи 25 март бо иштироки намояндагони бахши энергетика ва экологияи ҳукумат машварати корӣ баргузор намуд, ки дар он лоиҳаи сохтмони Маркази барқу гармидиҳӣ (МБГ)-и «Фон Яғноб» дар қаламрави ноҳияи Айнии вилояти Суғд мавриди баррасӣ қарор гирифт.
Сармушовири хадамоти матбуоти президенти ҷумҳурӣ Субҳиддин Муҳиддинов ба «Азия-Плюс» дар ин робита иттилоъ дод, ки лоиҳакашии иншооти зикршуда ҳанӯз замони мавҷудияти Иттиҳоди Шӯравӣ ҳамчунин нерӯгоҳи барқии давлатии ноҳиявӣ оғоз гардида буд.
«Бо назардошти афзоиши талаботи бахшҳои иқтисоду аҳолии кишвар ба нерӯи барқ, дар назар дошта шудааст, ки иқтидори марказ аз 700 то 1050 МВт-ро ташкил дода, таъмини он аз ҳисоби ангишти маҳаллӣ ба нақша гирифта шудааст», – гуфт номбурда.
Ба гуфтаи ӯ, муовини нахуствазири кишвар ба сохторҳои дахлдор дастур дод, ки ҷиҳати истифодаи пурсамари ангишти кони «Фон-Яғноб», ки беш аз 54% аз ҳаҷми умумии истеҳсоли ангишти кишварро ташкил медиҳад, тадбирҳои заруриву муассир андешанд.
