Суди ноҳияи Исмоили Сомонии шаҳри Душанбе роҳбари идораи шабакаҳои барқи ноҳияи мазкур Олим Нуровро барои риоя накардани тартиботи баррасии муроҷиати шаҳрвандон ҷаримабандӣ кард.
Аз суди ноҳияи Исмоили Сомонӣ ба «Азия-Плюс» дар ин робита иттилоъ доданд, ки Нуров мутобиқи моддаи 87-и Кодекси ҳуқуқвайронкунии маъмурии ҶТ (Риоя накардани тартибу муҳлати баррасии муроҷиати шаҳрвандон) гунаҳкор дониста шуда, дар ҳаҷми 1 ҳазору 200 сомонӣ ба нафъи давлат ҷарима баста шуд. Мурофиаи судӣ таҳти раёсати судя Сафарбек Нурализода баргузор шуд.
Дар мурофиа Олим Нуров ба гуноҳи худ иқрор шуда, изҳор намудааст, ки дарвоқеъ ҳам бинобар сабаби серкорӣ дар мавсими зимистон, ба муроҷатҳои истеъмолгарон дар робита ба мушкилоти марбут бо интиқолу таъминоти барқ саривақт посух дода натавонитааст.
Бино ба мкълумоти суд, ба гунаи мисол О.Нуров ба муроҷиати раиси маҳаллаи М.Турсунзодаи ноҳияи Исмоили Сомонии шаҳри Душанбе М.Абдуллоев оид ба садамаи трансформатор, ҳамчунин муроҷиатҳои дигар шаҳрвандон посух нагуфта, ҳатто ин муроҷиатҳоро дар китоби бақайдгирӣ сабт накардааст.
