Миёни Ҷамъияти саҳҳомии кушодаи «Фурудгоҳи байнулмилалии Душанбе» ва ширкати DPU investment GmbH-и Олмон оид ба сохтмони маркази логистикӣ дар фурудгоҳи пойтахти Тоҷикистон Ёддошт ба имзо расид.
Бино ба иттилои Кумитаи давлатии самоягузорӣ ва идораи амволи давлатии ҶТ, санад дар доираи кори ҳамоиши соҳибкорони Тоҷикистону Олмон, ки рӯзи душанбеи ҳамин ҳафта дар Душанбе доир гардид, ба имзо расидааст.
Гуфта мешавад, ҳамчунин аз рӯи натиҷаҳои ҳамоиш байни КВД “Тоҷинвест”-и Кумитаимазкур ва DPU investment GmbH-и Олмон оид ба ҷалби сармояи хориҷӣ ҷиҳати татбиқи лоиҳаҳои сармоягузории бахши хусусӣ низ Ёддошт ба имзо расидааст.
Дар маълумоти Кумита зикр мегардад, ки дар кори ҳамоиши тоҷирону соҳибкорони Тоҷикистону Олмон дар Душанбе 25 нафар соҳибкорони Олмон ва беш аз 100 нафар тоҷирони тоҷик ширкат варзиданд.
Ширкати DPU investment GmbH-и Олмон ба таҳияи лоиҳаҳо дар бахши энергетикаи алтернативӣ ва сарчашмаҳои барқароршавандаи энергия ва ҳамчунин ҷалби сармоягузориҳои байнулмилалӣ машғул аст. Аксари лоиҳаҳои ширкат дар кишварҳои узви Иттиҳоди Давлатҳои мустақил амалӣ шудаанд.
