Дар Колумбия кормандони мақомоти полис зимни гузаронидани корҳои тафтишотӣ аз қочоқгарон ба қариб 2 тонна маводи мухаддир дарёфт ва мусодира намуданд.
Бино ба иттилои сомонаи расмии шабакаи телевизиони «Ҷаҳоннамо», амалиёт дар бандари Буэнавентура, воқеъ дар минтақаҳои наздисоҳилии мамлакат дар уқёнуси Ором сурат гирифт. Аз ин миқдор 1,5 тоннааш какаин буда, арзиши он дар бозори сиёҳ 43,5 миллион долларро ташкил медиҳад. Ҳамчунин аз қочоқгарон ба миқдори 480 килограмм маводи махсус барои омоданамоии маводи мухаддир дарёфту мусодира гардид.
Гуфта мешавад, дар ҳамин ҳол кормандони мақомоти полиси Испания ҳам аз як кӯшиши интиқоли ғайриқонунии маводи мухаддир дар ҳаҷми махсусан хавфнок пешгирӣ кардаанд. Киштии ҳомили маводи мухаддир тахти парчами Конго ҳаракат мекардааст. Маводи мусодирашуда навъи ҳашиш буда, вазни он 16 тоннаро ташкил медиҳад. Арзиши ин бори марговар дар бозори сиёҳ 24 миллион евро тахмин зада мешавад. Бо ҷурми интиқоли ин бори марговар 9 нафар бо шумумли 6 шаҳрванди Сурия ва 3 шаҳрванди Ҳиндустон дастгир карда шуданд.
