Як гурӯҳ намояндагони ҷомеаи шаҳрвандӣ дар робита ба расонидани кумак барои табобати Маҳмадносири хурдсол, ки ба як бемории гоҳ-гоҳ дучормеомада гирифтор асту, табибон дар гузоштани ташхиси ин касалии ӯ мушкилӣ доранд, имрӯз ба қабули вазири тандурустии Тоҷикистон Нусратулло Файзулло рафтанд. Кӯдак мудом аз хориш азият мекашад.
Муҳайё Нозимова, яке аз узви ин гурӯҳ ба «Азия-Плюс» иттилоъ дод, ки ба қабули вазир дар маҷмӯъ 12 нафар рафтаанд. Табибони кӯдак гуфтаанд, барои муолиҷаи ӯ аз тамоми имконоту қобилияташон кор гирифтаанд.
Соли 2013 дар шуъбаи ҷарроҳии кӯдакона дар Душанбе талхадони ин кудак гирифта шудааст, зеро табибон ин узвро сабаби хоришак донистаанд.
«Вазир ба мо гуфт, ки дар ин ҷо табибон ба ҳеҷ иштибоҳе роҳ надодаанд, чунки баъзан хориш бинобар сабаби мушкилот бо талхадон пайдо мешавад ва гузашта аз ин, ҳеҷ як ҷарроҳӣ бидуни розигии волидон сруат намегирад», – мегӯяд Нозимова.
Ба гуфтаи ӯ, намояндагони ҷомеаи шаҳрвандӣ ба вазир фаҳмонидаанд, ки онҳо назди ӯ на барои эътироз, балки ҷиҳати донистани мавқеи Вазорати тандурустӣ оид ба ин масъала, яъне минбаъд чӣ чора андешидани вазорат нисбат ба ин масъала омадаанд.
«Вазир посух дод, ки Маҳмадносир таҳти назорат буда, вале касалиаш хеле кам вомехӯрад, аз ин рӯ, ташхис гузоштан ба он душвор аст. Ӯ ба мо итминон дод, ки худаш ҳам ба солим гаштани ин кӯдак манфиатдор буда, ҳамчун падару инсон ба ҳоли кӯдак дилаш месӯзад. Ӯ гуфт, ки вазорат ба Санкт-Петербург барои имкони муайян кардани ташхис ва табобат дархост равона карда, вале аз онҷо қонеъ кардани ин дархостро рад кардаанд. Айни замон аз Маскав посухро интизоранд. Дар ҳамин ҳол, вазир моро бовар кунонид, ки муолиҷаи кӯдакро пурра ба уҳдаи худ мегирад», – қайд кард Нозимова.
Вазир қотеъона ваъда додааст, ки Вазорати тандурустӣ барои табобати кӯдак дармонгоҳ дарёфт хоҳад кард ва бо ин мақсад воситаҳои муайяне ҳам ҷудо мекунад.
Дар ҳамин ҳол, Нозимова изҳор кард, ки алҳол онҳо бекор нанишаста, ба қабули дармонгоҳи Ибни Сино мераванд. Тибқи баъзе маълумот, дар муолиҷаи чунин бемориҳо табибони Эрон таҷриба доштаанд.
