Рӯзи 13 июл дар Душанбе вазири нақлиёти Тоҷикистон Шералӣ Ганҷалзода ва сафири Фаронса дар Тоҷикистон Диде Леруа Созишнома байни ҳукумати Тоҷикистон ва ҳукумати Фаронса оид ба сохтмони манораи назоратӣ-диспетчерӣ дар фурудгоҳи шаҳри Душанберо ба имзо расониданд.
Қобили зикр аст, ки моҳи феврали соли 2013 дар пойтахти Тоҷикистон оид ба сохтмони манораи 36-метраи назоратӣ-диспетчерӣ дар фурудгоҳи шаҳри Душанбе мувофиқа ҳосил шуда буд.
Бино ба маълумоти Вазорати нақлиёти ҷумҳурӣ, лоиҳа аз ҷониби мутахассисони фаронсавӣ таҳия шуда, барои амалисозии он 3,5 млн. евро маблағ зарур аст. Лоиҳа аз ҷониби Фаронса бар асоси грантӣ амалӣ мешавад. Муҳлати амалисозии лоиҳа 15 моҳ аз замони ба имзо расидани созишнома дуҷониба муқаррар шудааст.
«Бо дастгоҳу таҷҳизоти зарурӣ таъмин кардани манораи назоратӣ-диспетчерӣ ба дӯши корхонаи «Тоҷикаэронавигатсия» вогузор шудааст», – гуфтанд дар Вазорат.
