Дар мактаби таҳсилоти умумии №57-и ноҳияи Айнӣ маросими номгузории ин муассисаи таълимӣ ба номи корманди Дастаи таъиноти махсуси милитсияи ВКД майори милитсия Алибой Идиев баргузор гардид.
Бино ба иттилои маркази матбуоти ВКД Тоҷикистон, дар ин ҷамъомад муовини Вазири корҳои дохилӣ, генерал-майори милитсия Умарзода Икром, раиси ноҳия Неъматулло Раҳматуллозода, намояндагони шӯъбаи маориф ва пайвандони шодравон Алибой Идиев иштирок карданд.
Муовини Вазири корҳои дохилӣ Умарзода Икром аз саҳми кормандони мақомоти корҳои дохилӣ дар таҳкими суботу оромӣ ва мубориза бо ҷинояткорӣ ибрози назар карда, аз корнамоии корманди Дастаи таъиноти махсуси милитсияи ВКД, майори милитсия Алибой Идиев, ки дар ҳодисаҳои моҳи сентябр, ҳангоми иштирок дар муқовимати мусаллаҳона алайҳи гуруҳҳои муташаккили ҷинояткор ҳалок гардида буд, ёдовар шуд.
Мавсуф ба роҳбарияти мақомоти иҷроияи ҳокимияти давлатӣ дар ноҳияи Айнӣ, барои қабули пешниҳоди роҳбарияти Вазорат, ҷиҳати ба номи Алибой Идиев номгузорӣ кардани мактаби мазкур изҳори миннатдорӣ намуд.
Раиси ноҳия Неъматулло Раҳматуллозода иброз дошт, ки мо ҳамеша фарзандони диёрро дар симои Алибой Идиев, ки барои Ватан ва давлату миллат хизмат намудаанд, фаромӯш намесозем.
Дар чорабинӣ омӯзгорону ҳамсинфон ва дӯстону наздикони Алибой Идиев суханронӣ намуда, хотираҳои худро аз рӯзгори ӯ, ки замоне дар ин муассисаи таълимӣ таҳсил карда буд, ёдовар шуданд.
