Муовини сардори Раёсати молияи дастгоҳи президенти Тоҷикистон Амирҷон Убайдуллоев бар ин назар аст, ки асъори хориҷӣ ба Тоҷикистон натанҳо аз ҳисоби интиқоли маблағҳои пулӣ, балки аз ҳисоби содироти хушкмева низ ворид мешавад.
Зимни суханронӣ дар маросими муаррифии гузориши минтақавии иқтисодии Хазинаи байнулмилалии асъор (ХБА) дар Душанбе ӯ қайд кард, ки соли 2014 аз ҳисоби содироти хушкмева ба Тоҷикистон 1,4 млрд. доллари ИМА ворид шудааст.
Убайдуллоев таъкид дошт, ки коҳиши арзиши алюминий ва пахта дар бозорҳои ҷаҳонӣ ба иқтисоди кишвар як таъсири муайяне расониданд, аммо айни замон Тоҷикистон натанҳо ба содироти алюминий ва пахта, балки ба дигар навъи маҳсулот низ таваҷҷуҳи ҷиддӣ зоҳир мекунад.
Ба андешаи Убайдуллоев, феълан аломатҳои муайяни барқарор шудани иқтисоди кишвар ба мушоҳида мерасанд. Ӯ чунин мешуморад, ки «ҳукумати ҷумҳурӣ роҳи дурустро интихоб кардааст».
«Барои мо идомаи амалисозии тамоми ислоҳоти пешбинишуда зарур аст. Дар ин самт мо таҷрибаву имконоти муайяне дорем ва умедворем, ки ҳамаи мушкилотро паси сар карда метавонем», – афзуд номбурда.
