Бо дастури президенти мамлакат Эмомалӣ Раҳмон, шурӯъ аз имрӯз барои кумак ба аҳолии осебдидаи водии Бартанги ноҳияи Рӯшони ВМКБ ду чархболи Вазорати мудофиаи ҷумҳурӣ сафарбар мешаванд.
Роҳбари шуъбаи робита бо ҷомеаи ҳукумати ВМКБ Нилуфар Асламшоева тариқи телефон ба «Азия-Плюс» дар ин робита иттилоъ дод, ки бинобар номусоидии обуҳаво, чархболҳо рӯзи 8 декабр ба водии Бартанг парвоз карда натавонистаанд.
«Имрӯз, 9 декабр обуҳавошинсон ба парвози чархболҳо то маркази ноҳияи Рӯшон иҷозат доданд ва агар обуҳаво имкон диҳад, онҳо дар идома ба Бартанг раҳсипор мешаванд, вале агар имкони парвоз нашавад, бори онҳо – хаймаҳову маҳсулоти ғизойӣ тариқи автомашинаҳо ба осебдидагон расонида хоҳад шуд», – гуфт Асламшоева.
Зимнан зикр гардид, ки вазъи сарбанди кӯли Сарез баъди ҳодисаи заминларзаи рӯзи 7 декабр ҳеҷ хавфу хатаре надорад.
Комиссияи ҳукуматии таъсисёфта бо дастури президент таҳти раҳбарии муовини нахуствазир Азим Иброҳим дар роҳ ба самти Хоруғ буда, аз имрӯз роҳандозии фаъолияти ситод дар маркази маъмурии ВМКБ – шаҳри Хоруғ дар назар аст.
Раиси вилоят Шодихони Ҷамшед дар водии Бартанг қарор дорад, ки аз ҳама бештар аз заминларза осебдида эътироф мешавад. Имрӯз кӯчонидани одамони бесарпаноҳмонда аз Бартанг ба маркази Рӯшон дар нақша аст.
