Бонки миллии Тоҷикистон (БМТ) масъулият барои содир намудани муомилоти ғайриқонунӣ бо асъори хориҷиро сангинтар карданист.
Раиси БМТ Ҷамшед Нурмаҳмадзода зимни нишасти хабарӣ дар ин робита изҳор намуд, ки дар ин самт ворид намудани тағйироту иловаҳо ба қонунгузорӣ дар назар аст, ки дар онҳо барои содир намудани чунин амал ҷазои то 9 соли зиндон бо мусодираи амвол пешбинӣ мешавад.
Дар ин робита ӯ ҳамчунин қайд кард, ки мутахассисони Бонки миллӣ ҳамроҳ бо намояндагони дигар сохторҳои давлатӣ айни замон ба таҳияи тағйироту иловаҳои дахлдор машғуланд.
Раиси БМТ таъкид дошт, ки ҳамчунин чандин маротиба зиёд шудани ҳаҷми ҷарима барои ивази ғайриқонунии асъор пешниҳод мешавад. «Мо ба ҷорӣ кардани тартиботи нав дар ин самт маҷбурем, то ки ба содир гардидани муомилоти ғайриқонунӣ бо асъори хориҷӣ монеъа эҷод кунем», – иброз дошт Нурмаҳмадзода.
Қобили зикр аст, ки дар Кодекси ҷиноии амалкунандаи Тоҷикистон барои содир гардидани чунин амал ҷазо дар шакли ҷарима ва маҳрумият аз озодӣ пешбинӣ шудааст.
Дар моддаи 286-и Кодекси ҷиноии ҶТ барои муомилоти ғайриқонунӣ бо асъорӣ хориҷӣ ҷарима дар ҳаҷми аз 100 то 1460 нишондиҳандаи ҳисоб (аз 400 сомонӣ то 58,4 ҳазор сомонӣ – аз 50 то 7,5 ҳазор доллари ИМА) ё маҳрум гардидан аз озодӣ ба муҳлати то 8 сол пешбинӣ шудааст.
Ёдрас мекунем, ки чанд рӯз қабл президенти Тоҷикистон Эмомалӣ Раҳмон
ба масъулин дастур дод
, ки дар кӯтоҳтарин муҳлат барои ба қонунгузории амалкунандаи низоми бонкӣ доир ба танзими асъор ва ҷавобгарӣ барои вайрон кардани он тағйиру иловаҳо таҳия ва пешниҳод намоянд.
Тибқи дастури Сарвари давлат дар таҳрири нави Кодекси ҷиноятӣ ва дигар санадҳои дахлдори қонунгузорӣ бояд ҷавобгарӣ, аз ҷумла ҷавобгарии ҷиноятӣ, барои ба хориҷи кишвар баровардани ҳаҷми зиёди асъори байналмилалӣ ва барои хариду фурӯш бо асъори хориҷӣ дар қаламрави мамлакат пешбинӣ шавад.
