Ҳукумати Тоҷикистон масъалаи зиёд кардани ҳаҷми интиқоли нерӯи барқ ба аҳолии минтақаҳои ҷумҳурӣ дар моҳи февралро баррасӣ дорад.
Вазири энергетика ва захираҳои оби ҷумҳурӣ Усмоналӣ Усмонзода зимни нишасти хабарӣ дар ин робита изҳор намуд, ки айни замон шаҳрҳои нисбатан бузурги кишвар шабонарӯзӣ бо нерӯи барқ таъмин буда, аҳолии манотиқи деҳот на камтар аз 13 соат дар як шабонарӯз бо нерӯи барқ таъминанд.
«Бо дастури сарвари давлат Эмомалӣ Раҳмон ин масъала таҳти назорати қатъии ширкати «Барқи тоҷик» қарор дорад, – иброз дошт вазир. – Имрӯз ба минтақаҳо дар як шабонарӯз на камтар аз 13 соат нерӯи барқ интиқол дода мешавад. Рӯзҳои наздик беҳтар шудани таъминоти аҳолии минтақаҳо бо нерӯи барқ дар назар аст».
Ӯ қайд кард, ки айни замон захиарҳои оби обанбори Норак нисбат ба ҳамин давраи соли гузашта 1,35 метр ва дар муқоиса бо ҳамин давраи соли 2014 ба андозаи 5,5 метр баландтар аст.
«Ин ба мо имкон медиҳад, ки ҳаҷми интиқоли барқ ба аҳолиро зиёдтар кунем», – гуфт Усмонзода ва илова намуд, ки «моҳи феврал энергетикҳо кӯшиш мекунанд, ки ба реҷаи интиқоли барқ тағйирот ҷорӣ намоянд». «Аммо ҳамааш ба шароити обуҳаво вобаста хоҳад буд», – афзуд вазир.
