Вазири корҳои хориҷии Тоҷикистон Сироҷидин Аслов рӯзи 4 феврали 2016 сафири Давлати Амороти Муттаҳидаи Араб (АМА) Суҳайл ал-Катбиро ба муносибати анҷом ёфтани маъмурияти дипломатияш дар Тоҷикистон ба ҳузур пазируфт.
Бино ба иттилои Вазорати корҳои хориҷии ҷумҳурӣ, дар рафти суҳбат перомуни ҳолати муносибатҳои дуҷониба ва дурнамои тавсеаи ҳамкориҳои мутақобилан судманд дар соҳаҳои сиёсат, иқтисод, сармоягузорӣ ва фарҳангию башарӣ табодули афкор сурат гирифт.
Гуфта мешавад, татбиқи бомуваффақияти як қатор лоиҳаҳои муштарак, ки дар таҳкими муносибатҳои дӯстӣ ва шарикӣ миёни ду кишвар саҳми муайян гузоштанд, таъкид шуд.
Зимнан зикр мегардад, ки С. Аслов ба Сафир Ал-Катби барои маъмурияти пурсамари дипломатияш ба нафъи рушду тақвияти ҳамкориҳои гуногунҷанбаи Тоҷикистон ва Амороти Муттаҳидаи Араб изҳори сипос намуд.
