Кормандони Хадамоти давлатии назорати маводи нашъаовари Қирғизистон ду шаҳрванди Тоҷикистонро ба гумони даст доштан дар муомилоти ғайриқонунии маводи мухаддир боздошт намудаанд. Тавре иттилоъ дода мешавад, яке аз онҳо майори милитсияи Тоҷикистон будааст.
Бино ба иттилои сомонаи расмии Хадамот, 1 марти соли 2016 зимни як амалиёти пешакӣ муддати зиёд ва дақиқан таҳияшуда ба иттиҳоми машғул будан ба гардиши ғайриқонунии маводи мухаддир дар деҳаи Жажтики вилояти Ботканд автомашинаи тамғаи «Опел-Вектра» таҳти идораи корманди ВКД Тоҷикистон И.М., соли таваллудаш 1967 боздошт мешавад, ки дар дохили автомашина ҳамчунин боз як шаҳрванди дигари Тоҷикистон О.М., соли таваллудаш 1971, сокини шаҳри Душанбе низ ҳузур доштааст.
Гуфта мешавад, ҳангоми азназаргузаронии автомашинаи мазкур дар бағочи он ду сумкаи варзишӣ бо маводи мухаддири ҳашиш (чарси афғонӣ) дарёфт мешавад, ки вазнаш 36 килову 300 граммро ташкил додааст.
Зимнан зикр мегардад, ки ҳамин тариқ бори навбатӣ аз кӯшиши қочоқи маводи мухаддири афғонӣ тариқи қаламрави Қирғизистон пешгирӣ шуда, дар Раёсати тафтишоти Хадамот аз рӯи ин далел парвандаи ҷиноӣ оғоз гардидааст.
Дар ҳамин ҳол, дар Вазорати корҳои дохилии Тоҷикистон дар робита ба ин масъала изҳор намуданд, ки «аз ин маълумот огаҳие надоранд» ва ваъда доданд, ки «ояндаи наздик ин масъаларо шарҳу тавзеҳ хоҳанд дод».
