Ширкати давлатии алюминии Norsk Hydro-и Норвегия изҳор медорад, ки бо Ширкати алюминии Тоҷикистон (ТАЛКО) муомилоти тиҷоратии мухолифи қонунгузории кишварашро роҳандозӣ накардааст.
Дар
изҳороти
дар ин робита нашршуда дар сомонаи расмии Norsk Hydro гуфта мешавад, ширкат бо дархости Вазорати савдо, саноат ва хоҷагии моҳипарварӣ (NFD-и Норвегия нисбат ба робитаҳои тиҷоратиаш дар Тоҷикистон маълумоти иловагӣ пешниҳод намуда, дар он таъкид мешавад, ки Hydro ба ҳеҷ як «қонуншиканӣ, риояи накардани қоидаҳои дохилӣ ё принсипҳои асосӣ» дар муносибатҳои тиҷоратӣ бо Тоҷикистон роҳ надодааст ва ширкат ба фасод умуман таҳаммулпазир нест.
«Дар Тоҷикистон Hydro тибқи нархҳои бозор маҳсулот хариду фурӯш мекард ва ба ин кор агентҳо ё миёнаравонро ҷалб накардааст. Ширкат бо президенти Тоҷикистон гуфтушунид накардааст, ҳарчанд мо чун бо намояндагони ҳукумати бисёре аз кишварҳои дигар, ки дар онҳо машғули корем, якчанд вохӯриҳо гузаронидем», – омадааст дар изҳорот.
Таъкид мешавад, ки ширкат дар бораи шароитҳои кор дар Тоҷикистон бо Бонки ҷаҳонӣ, Бонки аврупоии таҷдиду рушд ва Хазинаи байнулмилалии асъор муколамаи озод доштааст.
«Дар робита ба мушкилот дар Тоҷикистон ва муносибатҳо бо ТАЛКО мо бо созмонҳои байнулмилалӣ муколамаи фаъолу кушод ва доманадор барпо кардем, зеро дар ҳалли ин масоили душвор ба машварат ниёз доштем», – қайд мекунанда дар ширкат.
Зимнан зикр мегардад, ки «чандин маротиба талош варзидем, ки ба беҳбуди сатҳи шаффофият, вазъи солимӣ, муҳити зист ва бехатарӣ дар ТАЛКО саҳми худро гузорем». «Пешрафт дар ин масъалаҳо сабаби муҳим шуд, ки дар робита ба он Hydro моҳи ноябри соли 2009 дар бораи минбаъд ба имзо нарасонидани қарордодҳо дар бораи хариду фурӯши металл қарор қабул намояд», – қайд мешавад дар изҳорот.
Ёдрас мекунем, ки чанд рӯз қабл
иттилоъ дода шуд
, ки парлумони Норвегия муносибатҳои мутақобилаи Norsk Hydro бо ширкати Talko Management Ltd (TML)-ро, ки ҳамаи муомилоти савдои ТАЛКО-ро анҷом медиҳад, мавриди омӯзиш қарор додааст.
Дар маълумот қайд шуда буд, ки санҷиш дар партави аз ҷониби мақомоти қонунгузори Норвегия баррасӣ шудани изҳорот оид ба далелҳои корррупсия дар як қатор корхонаҳои давлатии кишвар сурат мегирад.
Зикр гардида буд, ки кумитаи интизоми парлумони Норвегия ба ошкор намудани далелҳои аз ҳисоби муомилот бо Norsk Hydro бойтар шудани президенти Тоҷикистон Эмомалӣ Раҳмон машғул аст.
