Дар ҳошияи ҷаласаи Шӯрои вазирони корҳои хориҷии кишварҳои узви СҲШ дар Тошканд рӯзи 23 май вазири корҳои хориҷии Ҷумҳурии Тоҷикистон Сироҷидин Аслов бо вазири корҳои хориҷии Ҷумҳурии Мардумии Чин Ван И дидору гуфтушунид кард.
Бино ба иттилои Вазорати корҳои хориҷии ҶТ, дар рафти суҳбати самимона тарафҳо масоили васеи муносибатҳои дуҷониба ва бисёрҷонибаи Тоҷикистону Чин ва роҳҳои таҳкими минбаъдаи ҳамкориҳои мутақобилан судманд, аз ҷумла доир ба ҳамкорӣ дар соҳаҳои иқтисодию тиҷоратӣ, энергетикӣ, илмию гуманитарӣ ва дигар соҳаҳоро мавриди баррасӣ қарор доданд.
Гуфта мешавад, ҳамзамон ҷонибҳо оид ба масъалаҳои мубрами ҳамкорӣ дар доираи Созмони ҳамкории Шанхай мубодилаи афкор намуданд.
