Рӯзи 8 июн аввалин президенти Тоҷикистон Қаҳҳор Маҳкамов пас аз бемории тӯлонӣ дар синни 85-солагӣ дар Душанбе аз олам даргузашт.
Пайвандону наздикони марҳум ба «Азия-Плюс» иттилоъ доданд, ки Қаҳҳор Маҳкамов васият карда будааст, ки ӯро дар оромгоҳи Сари Осиё, паҳлӯи қабри ҳамсараш – Гавҳар, ки бо ҳам 64 сол зиндагӣ кардаву 4 сол қабл вафот карда буд, ба хок супоранд.
Маросими ба хок супурдани аввалин президенти Тоҷикистон имрӯз дар оромгоҳи Сари Осиёи пойтахт доир мегардад. Қаҳҳор Маҳкамов як писару як духтар дорад, ки ҳангоми марг дар сари болинаш қарор доштаанд.
Бино ба иттилои
Радиои Озодӣ
, исми Қаҳҳор Маҳкамов дар таърихи навини Тоҷикистон ҳамчун нахустин раисиҷумҳури Тоҷикистон ва ҳам ба унвони нахустин раҳбари аввали ин кишвар, ки таҳти фишор тазоҳуроти мардум истеъфо дод, боқӣ мемонад.
Чанде қабл, санаи 16 апрел Қаҳҳор Маҳкамов 84-умин солгарди зодрӯзашро ҷашн гирифта, хабарнигори «Азия-Плюс» бо ӯ
мусоҳиба ороста буд.
