Ба муносибати ҷашни 25-солагии истиқлолияти Тоҷикистон дар Варзишгоҳи марказии Тоҷикистон рӯзи 26 июн миёни дастаҳои «Истиқлол»-и Душанбе ва «Локомотив»-и Маскав бозӣ дӯстона баргузор мегардад.
Бино ба иттилои сомонаи расмии дастаи «Истиқлол», барои мухлисоне, ки бозиро аз нишастгоҳи мулоиму бофароғати VIP- ложаи варзишгоҳ тамошо карданианд, ба миқдори маҳдуд VIP-билетҳо пешниҳод шаддаанд, ки барои як ҷойи нишаст – 500 сомонӣ (65$) арзиш доранд. Инчунин, ҳангоми танаффус ба дорандагони VIP-билетҳо дар нуқтаи махсуси ғизохӯрӣ хизмат расонда мешавад.
Гуфта мешавад, нархи билетҳо ба дигар минбарҳои варзишгоҳ (асосӣ, шимолӣ, шарқӣ ва ҷанубӣ) 20 сомониро ташкил дода, фурӯши онҳо рӯзҳои наздик дар хазинаҳо (кассаҳо)-и Варзишгоҳи марказӣ оғоз мегардад.
Зимнан зикр мегардад, ки пас аз анҷоми бозӣ миёни мухлисон аз рӯи билетҳои воридшавӣ бозии лотерея гузаронида шуда, мухлисонро бурди навъҳои муосири смартфонҳои «Samsung Galaxy» ва ҷоизаи асосӣ – автомашинаи «Лада Приора» интизор аст.
