Вакилони палатаи поёнии парлумони кишвар баъди таътили якуниммоҳа аз пагоҳ, рӯзи 16 август дар кумита ва комиссияҳои Маҷлиси намояндагони Маҷлиси Олии Тоҷикистон ба кор шурӯъ мекунанд.
Тавре ба «Азия-Плюс» як манбаъ аз палатаи поёнии парлумон иттилоъ дод, рӯзи 16 август таҳти раёсати раиси палатаи поёнии парлумони ҷумҳурӣ Шукурҷон Зуҳуров ҷаласаи Шӯрои Маҷлиси намояндагони Маҷлиси Олии ҶТ доир мегардад.
«Дар ҷаласаи Шӯро лоиҳаи қонунҳои аз ҷониби ҳукумат ва дигар субъектҳои қонунофар пешниҳодшуда мавриди муҳоқима қарор гирифта, ҷиҳати такмилу баррасӣ ба кумита ва комиссияҳои дахлдори парлумон фиристода мешаванд», – гуфт манбаъ.
Зимнан зикр гардид, ки то охири моҳи сентябр вакилони марлумӣ дар кумита ва комиссияҳо кор карда, бо интихобкунандагони худ вохӯриҳо мегузаронанд ва 1 октябр дар Душанбе ҷаласаи нахусти иҷлосияи сеюми Маҷлиси намояндагони Маҷлиси Олии Тоҷикистон даъвати панҷум ба кор оғоз мекунад.
