Бо қарори ҳукумати Тоҷикистон қисмате аз маблағи қарзи ширкати «Барқи тоҷик» дар ҳаҷми ҳудуди 12,5 млн. сомонӣ (беш аз 1,5 млн. доллар) ба нерӯгоҳи барқи обии«Сангтӯда-1» аз эътибор соқит дониста шуд.
Дар санади аз ҷониби раиси ҳукумати ҶТ Эмомалӣ Раҳмон ба имзорасида аз 25 январи соли равон дастур дода мешавад, ки қарзи «Барқи тоҷик» ба ҶСК «НБО Сангтӯда-1» ба маблағи 12 млн. 495 ҳазору 845 сомонӣ аз ҳисоби харидории барқ кам карда шавад.
Маблағи мазкур ба фонди оинномавии «Барқи тоҷик» ба сифати саҳми муассис гузаронида мешавад. Муассиси холдинги энергетикӣ ҳукумати Тоҷикистон аст.
Ин маблағ ҳамчун пардохти қисмате аз қарзҳои мавҷудаи «Барқи тоҷик» ба нерӯгоҳи «Сангтӯда-1» ба назар гирифта шуда, ба ивази он ба ҳамин миқдор маблағ бақияи қарзи нерӯгоҳи «Сангтӯда-1» назди буҷети давлатӣ аз рӯи андоз кам карда мешавад.
Ҳаҷми умумии қарзи ширкати «Барқи тоҷик» назди нерӯгоҳи «Сангтӯда-1» ба аввали соли равон ҳудуди 655 млн. сомониро ташкил медиҳад. Тайи соли ахир қарзи ширкат назди нерӯгоҳ қариб 150 млн. сомонӣ афзуда, барои интиқоли барқ дар ҳаҷми наздики 2 млрд. кВт/соат дар соли гузашта «Барқи тоҷик» ҳамагӣ 250 млн. сомонӣ маблағ пардохт кардааст. Барқи нерӯгоҳ ба ширкати «Барқи тоҷик» бо арзиши 20,1 дирам барои 1 киловатт фурӯхта мешавад.
ҶСК «НБО Сангтӯда-1» корхонаи муштараки Русия ва Тоҷикистон аст, ки моҳи феврали соли 2005 бо мақсади сохтмон ва минбаъд баҳрабардорӣ қарор додани нерӯгоҳи барқи обӣ дар дарёи Вахши Тоҷикистон таъсис дода шудааст. Иқтидори нерӯгоҳи Сангтӯда-1 ба 670 МВт баробар аст. Ҳиссаи ширкати Русия дар сармояи оинномавии ҶСК «НБО Сангтӯда-1» – 75% тарҳи 1 саҳмия ва ҳиссаи Тоҷикистон – 25% ҷамъи 1 саҳмияро ташкил медиҳад.
Қобили зикр аст, ки ширкати «Барқи тоҷик» аз нерӯгоҳҳо барқ харида, онро ба истеъмолгарони худ интиқол медиҳад. Ҳар як киловатти барқи дар нерӯгоҳи «Сангтӯда-1» истеҳсолшударо ширкат бо арзиши 20,1 дирам ва «Сангтӯда-2»-ро бо нархи 25,6 дирам дастрас менамояд. Дар ҳамин ҳол, тарифи миёнаи барқ дар Тоҷикистон 24,6 дирамро ташкил медиҳад.
