Дар шаҳри Душанбе зани 27-солаи сокини ноҳияи Ҳамадонӣ ба гумони даст доштан дар ғорати гӯшвораҳои духтарчаҳои хурдсол боздошт шуд.
Бино ба маълумоти дафтари матбуоти ВКД Тоҷикистон, гумонбаршуда қаблан низ барои содир намудани ҷинятҳои ба ин монанд маҳкум шуда будааст.
Гуфта мешавад, зани гумонбаршуда гӯшвораҳои арзишноки духтарчаҳои хурдсолро бо роҳи зӯрӣ тасарруф намуда, аз ҷойи ҳодиса ғайб мезадааст.
«Номбурда 26-уми декабри соли 2016 дар кӯчаи Н.Қарабоев аз гӯши духтарчаи 9-солаи сокини шаҳри Душанбе як ҷуфт гӯшвори тиллоӣ, ки арзишаш 1 ҳазору 200 сомонӣ, 10-уми феврали соли ҷорӣ дар кӯчаи Қосимов гӯшвори тиллоии духтарчаи 8-соларо, ки арзишаш 1000 сомонӣ ва аз духтарчаи 10-солаи сокини пойтахт, гӯшвори арзишаш 800 сомониро тасарруф намудааст», – омадааст дар маълумоти ВКД.
Зимнан зикр мегардад, ки аз рӯи далели мазкур парвандаи ҷиноӣ боз шуда, тафтишот дар ин самт идома дорад.
