Рӯзи 14 апрел дар пойтахти Қирғизистон – шаҳри Бишкек президенти Русия Владимир Путин бо сарони кишварҳои Арманистон, Қазоқистон, Қирғизистон ва Тоҷикистон ғайрирасмӣ дидору гуфтушунид мекунад.
Бино ба маълумоти ВАО-и Русия бо истинод ба сухангӯи президенти ин кишвар Дмитрий Песков, рӯзи 15 апрел ба таъсиси СААД 15 сол пур шуда, дар ин робита Владимир Путин бо шабакаи телевизиону радиои «Мир» мусоҳиба мекунад.
Ҳадаф аз таъсиси СААД ҳимояи тамомияти арзӣ ва соҳибистиқлолии кишварҳои узви Созмон, ҳамчунин таҳкими амнияти минтақа ва ҷаҳон унвон мешавад.
Созмони Аҳдномаи амнияти дастаҷамъӣ бар асоси Шартнома дар бораи амнияти дастаҷамъии 15 майи соли 1992 аз ҷониби кишварҳои узви ИДМ баимзорасида таъсис дода шуд. Арманистон, Беларус, Қазоқистон, Қирғизистон, Русия ва Тоҷикистон кишварҳои узви СААД мебошанд. Охири моҳи июни соли 2012 Ӯзбекистон эълон кард, ки узвияти худ дар Созмонро бозмедорад.
Қобили зикр аст, ки 1 январи соли 2017 бинобар сабаби анҷоми муҳлати ваколатҳои Николай Бордюжа дар вазифаи дабири куллли СААД, иҷрои вазифаҳои ӯ ба дӯши муовинаш Валерий Семериков вогузор гардида, тасдиқи дабири кулли Созмон то нишасти баҳорӣ мавқуф гузошта шудааст.
