Аллакай муддати 10 рӯз аст, ки Ёсинҷон Мирови 4-сола, сокини деҳаи Сабзикори ҷамоати деҳоти Гулистони ноҳияи Рӯдакӣ бедарак аст.
«Мо чорабиниҳои ҷустуҷӯӣ гузаронида, бо ҳамсояҳо ва наздикони Ёсинҷон суҳбат кардем, лекин аз ин алҳол ҳеҷ натиҷае ҳосил нашуд. Писарчаи хурдсол то ҳол дарёфт нашудааст», – хабар доданд аз дафтари матбуоти ВКД Тоҷикистон.
Бино ба иттилои манбаъ, сурати Ёсинҷон дар тамоми шаҳр овехта шуда, ҳамчунин аксҳои ӯ ба минтақаҳои кишвар фиристода шудааст.
Ёдрас мекунем, ки Ёсинҷон Миров субҳи рӯзи 1 апрел аз хона баромада, бо ҳамин дигар барнагаштааст.
Дар ҳамин ҳол, зикр шуд, ки волидони дигар писарчаи хурдсол, ки дар қабулгоҳи ВКД қарор дорад, то ҳол дарёфт нашудаанд. Писарча санаи 1 апрел дарёфт ва ба мақомоти милитсия оварда шудааст.
Синни писарчаи хурдсол 4-5-сола буда, мегӯяд, ки Кароматулло ном дорад, номи падараш – Қурбон ва модараш – Зебо аст, лекин суроғаи макони зисташро намедонад.
Вазорати корҳои дохилии Тоҷикистон аз шаҳрвандон дархост мекунад, ки агар касе дар бораи Ёсинҷон ягон маълумоте дошта бошад, бо телефони 221-21-21 ё 93 121-50-01 ба ВКД занг занад.
Дар сурати маълумот доштан дар бораи Кароматулло шаҳрвандон метавонанд бо телефонҳои 221 21 21 ё 93 922 84 74 занг зананд.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
