Шаби 6 ба 7-уми октябр Хол Машрабов, собиқ раиси Кумитаи андоз ва яке аз чеҳраҳои бонуфузи ҷумҳурӣ дар солҳои 90-ум дар синни 69-солагӣ аз олам даргузашт.
Маросими видоъ ва ҷанозаи ӯ рӯзи 7 октябр дар Душанбе баргузор шуд. Аз соли 2008 ӯ аз беморӣ азият мекашид ва ахиран ин беморӣ авҷ гирифт.
Аз соли 1998 то соли 2001 Хол Машрабов Кумитаи андозро роҳбарӣ карда, муддати 5 сол раисии ноҳияи Рӯдакӣ – бузургтарин ва сераҳолитарин ноҳияро бар дӯш дошт. Бародараш Ибодулло Машрабов муовини аввали вазири фарҳанги ҷумҳурӣ аст.
Хол Машрабов 1 январи соли 1951 дар ноҳияи Варзоб ба дунё омадааст. Хатмкардаи техникуми кооперативӣ (1969) ва факултаи банақшагирии хоҷагии халқи Донишгоҳи давлатии Тоҷикистон (1989) мебошад. Солҳои гуногун ба ҳайси челонгар, фурӯшанда ва мудири мағоза, директори трести хӯроки умумӣ (Общепит)-и ноҳияи Ленин (феълан Рӯдакӣ) кор кардааст.
Солҳои 1987-1989 ба сифати раиси Иттифоци истеъмолгарони ноҳияи Варзоб, солҳои 1989 – 1993 раиси Иттифоқи истеъмолгарони шаҳри Душанбе фаъолият намудааст.
Аз соли 1990 – вакили Шӯрои олии Тоҷикистон, солҳои 1994 – 1998 раиси ноҳияи Ленин; солҳои 1998-2001 – раиси Кумитаи андоз. Соли 2005 вакили Маҷлиси миллии Маҷлиси Олии Тоҷикистон даъвати сеюм аз ҳавзаи интихоботии №5, ноҳияҳои тобеи марказ. Давоми солҳои 2001 – 2006 ба ҳайси раиси ноҳияи Рӯдакӣ кор кардааст.
Хабарҳои моро дар Telegram пайгирӣ намоед, ба шабакаи мо бо суроғаи https://t.me/asiaplus ҳамроҳ шавед.
