Пас аз мулоқот вазирони корҳои хориҷӣ – Сироҷиддин Муҳриддин ва Сергей Лавров ба рӯзноманигорон дар бораи омодагӣ ба сафари Президенти Тоҷикистон ба Русия, баррасии фаолияти НБО “Сангтӯда-1”, муҳоҷират ва донишҷӯёни тоҷик дар Русия, изҳори назар карданд.
Вазири корҳои хориҷии Тоҷикистон Сироҷиддин Муҳриддин ба рӯзноманигорон гуфт, ки дар ҷараёни мулоқоти Сергей Лавров бо Президенти Тоҷикистон Эмомалӣ Раҳмон масоили муҳими вобаста ба ҳамкории дуҷониба ва бисёрҷонибаи Тоҷикистону Русия баррасӣ шуд.
Ғайр аз ин, вазири корҳои хориҷӣ зикр намуд, ки дар мулоқот омодагӣ ба сафари Президенти Тоҷикистон Эмомалӣ Раҳмон ба Русия, ки соли 2019 дар назар аст ва имзои маҷмӯи ҳуҷҷатҳо дар сатҳи баланд муҳокима гардиданд.
Ӯ ҳамчунин зикр намуд, ки имрӯз дар Душанбе миёни вазоратҳои корҳои хориҷии Тоҷикистону Русия барномаи ҳамкорӣ барои соли 2019 имзо гардид.
“Мулоқот дар фазои анъанавии дӯстӣ ва эътимод доир шуд”,- зикр намуд вазири корҳои хориҷии Тоҷикистон.
Ӯ илова намуд, ки зимни мулоқот пайванди анъанавии сиёсӣ, иқтисодӣ, гуманитарӣ ва ҳамкории ҳарбии Тоҷикистону Русия баррасӣ гардиданд. Таваҷҷуҳи махсус ба вазъи Афғонистон зоҳир карда шуд.
Лавров ба рӯзноманигорон дар бораи мулоқоти худ бо сарвари давлати Тоҷикистон сухан кард.
“Бо Президент Эмомалӣ Раҳмон суҳбати давомдор ва босамар доштем”,- гуфт ӯ.
Вазири корҳои хориҷии Русия зикр намуд, ки гардиши мол байни ду кишвар дар як соли охир афзун гардида, ба 1 млрд доллар наздик шудааст.
Ба қавли Лавров, дар мулоқот масъалаҳои вобаста ба НБО “Сангтӯда-1” низ баррасӣ гардидааст.
“Мо ва ҳамкорони тоҷики мо ҳавасманди идомаи фаъолияти самаранок ва манфиатовари ин нерӯгоҳ ҳастем”,- гуфт Лавров.
Ӯ зикр намуд, ки ҷониби Русия ҳавасманди идомаи ҳамкорӣ дар татбиқи лоиҳаҳои дигари маблағгузорӣ, аз ҷумла дар самти гидроэнергетика, аст.
Инчунин, Лавров иброз дошт, ки дар ҷараёни суҳбат ҳамкории гуманитарӣ, аз ҷумла лоиҳаи ба Тоҷикистон фиристодани муаллимаҳои рус низ баррасӣ шудаанд.
Ба қавли ӯ, маҷмӯи ҳуҷҷатҳо омода шуда истодаанд, ки пас аз он ҷониби Русия ба сохтмони 5 мактаби русӣ дар ҳудуди Тоҷикистон шуруъ мекунад.
“Ҳоло 28 ҳазор донишҷӯёни тоҷик дар донишгоҳҳои Русия таҳсил менамоянд. 8 ҳазори онҳо дар филиалҳои донишгоҳҳои Русия, ки дар ҳудуди Тоҷикистон фаъолият менамоянд, таҳсил доранд”,- гуфт Лавров.
Ғайр аз ин, дар мулоқот масоили муҳоҷират низ муҳокима гардидааст.
“Ҷониби Тоҷикистон масъалаи ба таври дастаҷамъона фиристодани муҳоҷирон барои кор дар Русия, таъмини нафақаи онҳоро ба миён гузоштанд. Барои муҳоҷирони тоҷик имкониятҳои васеъ фароҳам оварда шудааст”,- зикр намуд Лавров.
Ҳамчунин вазир гуфт, ки дар пасманзари таҳдидҳо аз Афғонистон, ҷониби Русия аллакай ба модернизатсияи қувваҳои мусаллаҳи Тоҷикистон оғоз намудааст.
“Дар бораи ҳамкорӣ бо Осиёи Марказӣ андешаҳои ҷолиби зиёд баён карда шуд. Дар умум, мо хуб кор кардем”,- ҷамбаст намуд Лавров ва аз ҳамтои худ Сироҷиддин Муҳриддин даъват намуд, ки бо сафари ҷавобӣ ба Русия ташриф орад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
