Раиси Кумитаи ҳолатҳои фавқулода ва мудофиаи граждании Тоҷикистон генерал-лейтенант Рустам Назарзода бо ҳайати Иттиҳоди Аврупо (ИА) таҳти сарварии намояндаи махсуси Иттиҳод оид ба Осиёи Марказӣ Петер Буриан, ҳамзамон роҳбари намояндагии ИА дар Тоҷикистон хонум Мэрилин Йосефсон дидору гуфтушунид кард.
Бино ба иттилои дафтари матбуоти КҲФ ва МГ-и ҷумҳурӣ, зимни мулоқот Рустам Назарзода зарурати бунёди машқгоҳи Кумитаро барои омодасозии воҳидҳои наҷотбахш қайд кард. Зимнан масоили ҳамкории минбаъдаи дуҷониба дар ин самт баррасӣ шуд.
“Машқгоҳ натанҳо ба омода кардани наҷотбахшони Кумита, балки ба рушди мақомоти наҷотдиҳандаи Афғонистон кумаки беандоза мекунад. Масофаи тӯлонии сарҳад бо ҳамсояи ҷанубӣ, инчунин мавқеи ҷуғрофӣ ва шабоҳати офатҳои табиӣ дар манотиқи наздимарзӣ тақозо мекунад, ки наҷотбахшони кишварҳои мо огоҳии бештар ва дар ҳолати омодабош қарор дошта бошанд”, – қайд кардааст роҳбари Кумита.
Гуфта мешавад, Петер Буриан ба ҳамкорӣ бо Тоҷикистон, бахусус, дар масоили коҳиши хатари офатҳои табиӣ изҳори омодагӣ кард.
“Мутаассифона, тағйири иқлим ба афзоиши ҳодисаҳои офатҳои табиӣ таъсир расонида, аз оқибатҳои он дар навбати аввал аҳолӣ осеб мебинад. Аз ин рӯ, барои ҳалли ин мушкилот ё сабуктар кардани пайомадҳои он мо ҳамаҷониба омодаем”, – таъкид дошт ӯ.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
