Имрӯз дар Душанбе Ҳафтаи таҳсилоти байнулмилалӣ оғоз шуд, ки аз ҷониби сафорати ИМА дар Тоҷикистон гузаронида мешавад.
Маросими ифтитоҳи чорабинӣ бо намоишгоҳи таҳсилотӣ дар Китобхонаи миллии Тоҷикистон соати 14:00 доир мегардад.
Дар намоишгоҳ муассисаҳои зерин маълумот пешниҳод мекунанд: Шӯроҳои амрикоӣ оид ба таҳсилоти байнулмилалӣ (ACCELS), Education USA, Марказҳои амрикоӣ (American Spaces), Донишгоҳи Осиёи Марказӣ, Маркази фарҳангии “Бактрия”, ҳамчунин сафорати Бритониёи Кабир, Ташкилоти ҷамъиятии “Пешрафт”, Илмхона, Шуъбаи ташкилоти байнулмилалии Институти “Ҷамъияти Кушода” – Бунёди Мадад дар Тоҷикистон ва Дафтари кории миллии Эразмус+.
Намояндагони ҳар кадоме аз ин ташкилотҳо ҳозиринро бо барномаҳои таҳсилотӣ шинос карда, дар бораи шароиту имконот маълумот медиҳанд ва ба суолҳои иштирокдорон посух мегӯянд.
Ҳафтаи таҳсилоти байнулмилалӣ имкони табодули маълумот оид ба таҳсил дар саросари ҷаҳон мебошад. Ин ташаббуси муштараки Департаменти давлатӣ ва Вазорати маорифи ИМА дар доираи талошҳо баҳри омода кардани мардуми Амрико ба муҳити глобалӣ ва ҷалби пешвоёни оянда аз хориҷа барои таҳсил, омӯзиш ва табодули таҷриба дар Иёлоти Муттаҳида гузаронида мешавад.
Тавре дар намояндагии дипломатии ИМА қайд мекунанд, барномаҳои табодули таҷриба барои рушдии тафоҳум ва эҳтиром, инкишофи пешвоӣ дар хориҷа ва саҳм гузоштан ба рушди минбаъдаи муносибатҳо байни ИМА ва мардумони кишварҳои дигар хеле муҳиманд.
Зикр мешавад, ки Ҳафтаи таҳсилоти байнулмилалӣ то 22-юми ноябр идома меёбад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
