Шурӯъ аз 1-уми декабри соли ҷорӣ арзиши оби нӯшокӣ ва рафъи партовоб дар Хуҷанд барои аҳолӣ ва ташкилотҳои буҷавӣ ба ҳисоби миёна 20% гарон шуд. Дар ин бора аз Корхонаи воҳиди давлатии коммуналии “Хуҷандобуканал” иттилоъ доданд.
Минбаъд сокинони маҳаллӣ барои 1 метри мукааб оби нӯшокӣ 1 сомонию 20 дирам ва рафъи 1 метри мукааб партовоб 80 дирам мепардозанд. То ин замон барои ҳамин андоза оби ошомиданӣ 1 сомонӣ ва барои рафъи партовоб 60 дирам муайян шуда буд.
Нарх барои ташкилотҳои буҷавӣ барои 1 метри мукааб оби нӯшокӣ 2 сомонию 04 дирам ва рафъи партовоб 1 сомонию 20 дирам бо иловаи 18% андоз аз арзиши иловашуда муқаррар гардидааст. Пештар ташкилотҳои буҷавӣ баҳри оби ошомиданӣ 1 сомонию 70 дирам ва рафъи партовоб 1 сомонӣ мепардохтанд.
Ҳамзамон барои ташкилотҳои хоҷагидорӣ нарх бетағйир мондааст. Онҳо барои 1 метри мукааб оби нӯшокӣ 6 сомонӣ ва рафъи партовоб 1 сомонию 70 дирам месупоранд.
Мудири кулли КВДК “Хуҷандобуканал” Носир Ғафурзода мегӯяд, ин болоравии нарх дар асоси фармоиши Хадамоти зиддиинҳисории назди Ҳукумати ҶТ таҳти рақами №165 аз 25-уми октябри соли ҷорӣ ва қарори раиси шаҳри Хуҷанд таҳти рақами №732 аз 26-уми ноябр “Дар бораи тасдиқ намудани нархномаҳои истифодабарии оби нӯшокӣ ва хизматрасонии рафъи партовоб” сурат пазируфтааст.
Вай афзуд, ки бори охир арзиши оби нӯшокӣ ва рафъи партовоб дар шаҳри Хуҷанд 1-уми январи соли 2017 боло рафта, то кунун бетағйир монда буд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
