Бо қарори додгоҳи ноҳияи Исмоили Сомонии шаҳри Душанбе як сокини пойтахт барои иштирок накардани писараш дар дарсҳо ҷарима шудааст.
Бино ба иттилои сомонаи хабарии суди ноҳияи Исмоили Сомонӣ, як хонандаи синфи 11-и мактаби миёнаи № 4-и шаҳри Душанбе бе сабабҳои узрнок 140 соат дар дарсҳо иштирок накардааст.
Суд падари хонандаро барои вайрон кардани моддаи 9 сархати 7-и Қонуни ҶТ “Дар бораи масъулияти падару модар дар таълиму тарбияи фарзанд” гунаҳкор дониста, ҳангоми таъини ҷазо хусусияти ҳуқуқвайронкунии маъмурии содирнамуда, шахсияти ӯ, ҳолатҳои сабуккунандаи ҷавобгарии маъмурӣ, вазъи молу мулкӣ ва оилавиро ба эътибор гирифтааст.
Сипас ӯро бо моддаи 90-и Кодекси ҳуқуқвайронкунии маъмурии ҶТ (Аз тарафи падару модар ё дигар намояндагони қонунии ноболиғон иҷро накардани уҳдадориҳои парасторӣ ва таълиму тарбияи ноболиғон) гунаҳкор дониста, ҷазо дар намуди ҷаримаи маъмурӣ ба андозаи се нишондиҳанда барои ҳисобҳо баробар ба 165 сомонӣ ба фоидаи давлат таъин кардааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
