Раиси ноҳияи Вахш Қурбон Юсуфов имрӯз, 21-уми июл дар нишасти хабарӣ изҳор дошт, ки тӯли як соли фаъолияташ қароре дар бораи ҷудо кардани қитъаи замин ба имзо нарасондааст.
“Ман шахсан худдорӣ мекунам. Имрӯз як соли фаъолияти кориям мешавад. Ягон қарор имзо накардаам. Вақте қарори ҳукумати ҷумҳурӣ мебарояд, раиси ноҳия баррасӣ накунад, ба ҷавобгарӣ мекашанд. Имрӯз дар ноҳияи Вахш замини наздиҳавлигӣ намондааст”, – гуфт раиси ноҳия.
Қурбон Юсуфов афзуд: “Вақте аризаҳо ҷамъ шуданд, имрӯз мумкин аз 500 ё 1000 дона зиёданд, мо ба Дастгоҳи иҷроия мефиристем, аввал ба вилоят, сипас ба ҷумҳурӣ мактуб мекунем. Агар иҷозат диҳанд, ҷудо мекунем. Ман шахсан ҳуқуқи додани замини наздиҳавлигиро надорам”.
Ба қавли ӯ, аризаҳо барои ҷудо кардани ягон қитъа аз ҳисоби замини наздиҳавлигии падари муроҷиаткунанда дақиқ омӯхта мешаванд, то ин ки худсарона забт нашуда бошанд, баъдан қарор дар бораи вобаста кардан ба имзо мерасад.
Ёдовар мешавем, ки Қурбон Юсуфов моҳи июли соли 2019 бо фармони президент ба вазифаи иҷрокунандаи раиси ноҳияи Вахш таъин шуд. Ӯ қаблан роҳбарии хоҷагии тухмипарварии “Кӯлоб”-и ноҳияро ба уҳда дошта, яке аз соҳибкорони муваффақ маҳсуб мешуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
