Як қисми ширкати ҶДММ “Баракати Ҷомӣ”, ки ба оилаи Муродалӣ Алимардонов тааллуқ дорад, барои сари вақт напардохтани маблағҳои қарзи бонкӣ ба фоидаи давлат мегузарад.
Дар ин бора Саид Ёқубзод, раиси ноҳияи Абдураҳмони Ҷомӣ рӯзи 24-уми июл дар нишасти матбуотӣ хабар дод.
“Аллакай гурӯҳи корӣ таъсис дода шудааст, ки ҳисоботҳои мувозинавиашро дида мебарояд. Мумкин рӯзҳои наздик ба итмом расад. Ҳамон хоҷагӣ бо 400 гектар замин ва 220 сар гови зотӣ ба Агентии таъминоти амволи махсуси назди Ҳукумати ҶТ мегузарад. Сабабашро ба мо нагуфтанд. Аз рӯйи маълумоти чӣ хеле русҳо мегӯянд “сарафанное радио”, дар вақташ ин хоҷагӣ аз бонк қарзҳои имтиёзнок гирифтааст. Бинобар сари вақт пардохт напардохтани қарз, ин амвол бояд ба фоидаи давлат гузарад. Ҳоло ин расман тасдиқ нашуда, маълумотро худи хоҷагидорҳо мегӯянд”, – изҳор дошт раиси ноҳия.
Ба қавли Саид Ёқубзод, нисбат ба роҳбари ҶДММ “Баракати Ҷомӣ” Муродалӣ Мирзоев 2 моҳ боз тафтишоти мақомоти ҳифҳи ҳуқуқ ҷараён дорад.
“Ҳоло дар ин ширкат роҳбари муваққатӣ таъин карданд. Қисме аз заминҳои онҳо кишт нашуданд. Мо заминҳои холимондаи ин ширкатро ба мардуми маҳаллӣ тақсим кардем, то самаранок истифода бурда, андозҳояшро супоранд. ҶДММ “Баракати Ҷомӣ” дар чанд самт фаъолият мекунад. Аз ҷумла, дар мувозинаи ин ширкат хоҷагиҳои тухмипарварӣ, боғпарварӣ ва чорвопарварӣ ҳаст”, – афзуд ӯ.
Қобили зикр аст, ки моҳи феврал Саид Ёқубзод дар нишасти матбуотии қаблияш гуфта буд, ки ширкатҳои оилаи Алимардоновҳо аз ҳисоби андоз 1,5 миллион сомонӣ қарздоранд. Рӯзноманигорон аз раиси ноҳия пурсиданд, ки Алимардоновҳо ин қарзашонро пардохтанд?
Дар посух ба ин суол Ёқубзод гуфт: “Яке аз қисматҳои ширкаташон, яъне корхонаи пахтатозакунии “Рушди Ҷомӣ”-ро ба дигар нафар фурӯхтанд. Қисме аз қарзҳое, ки ба ин корхона дахл дошт, ба соҳибмулки нав гузашт. Ҳозир қарзи ширкати ҶДММ “Баракати Ҷомӣ” 489 ҳазору 674 сомониро ташкил медиҳад”.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
