Шоҳрух Қирғизбоев, дарвозабони ҷавони дастаи “Хуҷанд” пас аз чанд лаҳзаи “облава” шуданаш боз раҳо шудааст. Ӯро ба хотири бозиҳои Ҷоми Осиё, ки дар назар аст тобистони имсол дар Бишкек доир мешавад ба хидмат набурданд. Шоҳрух дар ин бозӣ ҳамчун дарвозабон дар тими мунтахаби миллии Тоҷикистон баромад мекунад.
Дирӯз, 14-уми апрел чанд тан аз кормандони комиссариати ҳарбӣ Шоҳрух Қирғизбоевро пас аз анҷоми тамрин дар назди варзишгоҳи “20 солагии Истиқлолияти Тоҷикистон” дар шаҳри Хуҷанд “облава” карда буданд.
Хабари ба таври иҷборӣ боздошту ба хидмат бурдани ин дарвозабон дар гурӯҳи фейсбукии “Ҷаҳони Футболи Тоҷик” пайдо шуд. Дар ин гуруҳ навиштаанд, ки “худи имрӯз пас аз анҷоми тамринҳо, кормандони комиссариати ҳарбӣ дарвозабонро 10 нафара аз дохили варзишгоҳ бурданд. Шоҳрух дар ҳамин равзанаи трансферии тобистона аз тими "Истиқлол" ба ҳайати "Хуҷанд" пайваст. Ин маротибаи якум нест, ки футболбозонро ба хидмати ҳарбӣ мебаранд”.
Мурод Умаров, директри иҷроияи дастаи “Хуҷанд” дар суҳбат ба “Азия-Плюс” хабари “облава” шудани Шоҳрух Қирғизбоевро таъйид карда гуфт, ки ӯро пас аз анҷоми тамрине дар назди варзишгоҳи “20 солагии Истиқлолияти Тоҷикистон” дар шаҳри Хуҷанд боздошт карданд. Аммо ӯ гуфт, кормандони коммисариати ҳарбӣ пас аз чанд лаҳзаи бурдан боз ӯро ҷавоб доданд.
“Шоҳрух бозингари тими миллӣ аст ва моҳҳои июн бозиҳои Ҷоми Осиё доир мешавад ва аз ин рӯ ӯро ҷавоб доданд. Ин бозӣ дар Бишкек мегузарад ва дар он тими мунтахаби Қирғизистон, Сингапур, Мянма бозӣ мекунанд. Шоҳрух Қирғизбоев ҳамчун дарвозабон тими мунтахаби миллии Тоҷикистонро дар он муаррифӣ мекунад. Ӯ ҳам ба дастаи “Хуҷанд”-и Хуҷанд ва ҳам дастаи тими мунтахаби миллӣ дарвозабон аст”.-гуфт, Мурод Умаров.
Аммо ӯ изҳор дошт, ки барои рафтани футболбозон ба ҳарбӣ муқобил нест. Ба гуфтаи Мурод Умаров, директри иҷроияи дастаи “Хуҷанд” бисёри бозингарони ин даста донишҷӯёну яккаписар ҳастанд ва агар мӯҳлати кадоме аз онҳо расида бошад бояд, рафта хидмат кунанд.
“Мо имсол Парвиз Алиев ҳамлагари дастаи “Хуҷанд”-ро ба хидмат равон кардем ва дар яке аз қисмҳои низомии Вазорати мудофеъ хидмат мекунад ва дар дастаи Душанбе баромад мекунад. Мо ягон футболистро пинҳон намекунем, кадомаш, ки вақту соаташ омад бояд хидмат кунад. Ин вазифаи ҳар як шаҳрванди Тоҷикистон аст”.
Шоҳрух Қирғизбоев 22 сол дорад ва аз ноҳияи Ҷаббор Расулови вилояти Суғд мебошад. Ӯ ҳамагӣ чанд моҳ пештар аз дастаи “Истиқлол” ба дастаи “Хуҷанд”-и Хуҷанд пайваст. Ҳоло мусобиқаи қаҳрамонии футболи Тоҷикистон миёни бошгоҳҳои лигаи олӣ оғоз шудааст ва ин дарвозабон ҳам ба ин мусобиқа ва ҳам ба бозиҳои Ҷоми Осиё омодагӣ мебинад.
Дар Telegram, Facebook, Instagram, OK ва ВК бо мо бимонед.
