Байни Вазорати маориф ва илми кишвар ва ноширони давлатӣ дар робита ба нашри китобҳои бадеӣ ва тақсимоти он ба муасисаҳои таълимӣ баҳсе ба миён омадааст. Масъулини муассисаҳои нашриёти давлатӣ, мегӯянд, то имрӯз вазорати маориф ва роҳбарияти шаҳру вилоятҳо барои дастрас намудани китобҳои нашркардаи онҳо талоше анҷом надодаанд. Вале вазорат афзуд, дар 10 соли охир беш аз 770 номгӯй китоби бадеӣ нашр карда, ба муассисаҳои таълимӣ дастрас кардааст.
Вазорати маориф ва илми Тоҷикистон ин иттилоъро дар посух ба як матлаби Раҷаб Мирзо, журналист ва фаъоли ҷомеаи шаҳрвандӣ, дар сафҳаи расмиаш дар “Фейсбук” нашр кардааст.
Ба иттилои манбаъ, тиражи умумии китобҳои бадеие, ки дар давоми солҳои 2012-2022 нашр шудаанд, беш аз 4 миллиону 150 ҳазор нусхаро ташкил медиҳад.
Ин ниҳод гуфтааст, ки теъдоди зиёди адабиёти бадеии аз ҷониби муассисаҳои нашриявии «Адиб», «Маориф» ва «Адабиёти бачагона» нашр гардида, ҷиҳати харидорӣ аз ҷониби мактабҳо ба «Адиб» ва раёсату шуъбаҳои маорифи шаҳру ноҳияҳои ҷумҳурӣ мактуб ирсол шудааст.
Ба навиштаи манбаъ, тайи солҳои охир Вазорати маориф ва илми Тоҷикистон аз муассисаи нашриявии «Адиб» 428 номгӯй ба миқдори қариб 276 ҳазор нусха, аз муассисаи нашриявии «Маориф» 61 номгӯй наздикӣ 88 ҳазор нусха адабиёти бадеиро харидорӣ намуда, ба муассисаҳои таълимии кишвар дастрас гардонидааст.
“Бо ҳамкории Фонди шарикии глобалӣ дар соҳаи маориф 39 номгӯй китоби дарсии бачагона ба миқдори 1 миллиону 731 ҳазору 600 нусха, Лоиҳаи «Ҳамроҳ бихонем» 178 нусха ба миқдори 1 миллиону 308 ҳазору 720 нусха китобҳои бадеӣ ба китобхонаҳои муассисаҳои таълимӣ ирсол карда шудааст”, – менависад манбаъ.
Илова бар ин, 30 номгӯй адабиёти бадеӣ ба теъдоди умумии 210 ҳазор нусха ва дар соли 2022-юм 17 номгӯй китоби бадеӣ бо теъдоди умумии 131 ҳазору 134 нусха нашр ва ба марказҳои инкишофи кӯдак ва кӯдакистонҳои назди раёсат ва шуъбаҳои маорифи шаҳру ноҳияҳои ҷумҳурӣ дастрас гардонида шудааст.
Дар ҳамин ҳол, гуфта мешавад, ки дар соли 2023 Вазорати маориф ва илми Тоҷикистон бо дастгирии шарикони рушд нашри 40 номгӯй китоби бадеиро аз осори адибони тоҷик ва адабиёти ҷаҳон барои хониши беруназсинфии хонандагони муассисаҳои таҳсилоти умумӣ ба нақша гирифтааст.
Бояд гуфт, Раҷаб Мирзо дар матлаби худ таҳти унвони “Вақте супориши Президент иҷро намешавад” гуфта буд, ки “масъулини муассисаҳои нашриявии давлатӣ, аз ҷумла Энсиклопедияи миллии тоҷик, "Ирфон", "Адиб", ки аз ҳисоби Фонди захиравии Президенти Тоҷикистон китоб нашр мекунанд, мегӯянд, то имрӯз на масъулини Вазорати маориф ва илм, на роҳбарияти шаҳру вилоятҳо барои дастрас намудани китобҳои нашркардаи онҳо талоше анҷом надодаанд”.
Ҳарчанд, ба гуфтаи ӯ, рӯзи 11 августи соли гузашта зимни ифтитоҳи мактаби №15 -и шаҳри Конибодом Эмомалӣ Раҳмон, раисҷумҳури Тоҷикистон ба масъулини вазорати маориф ва илм, ҳамчунин сохторҳои дигар супориш дода буд, ки китобхонаҳои макотиби кишвар дар баробари китобҳои дарсӣ бояд бо китобҳои бадеӣ низ ғанӣ гардонида шаванд.
Ёдовар мешавем, ки дар аввали моҳи декабри соли 2022 Вазорати маориф ва илми Тоҷикистон гуфта буд, танҳо дар ин сол онҳо беш аз 4 млн нусха китоби дарсӣ нашр кардаанд, аммо то имрӯз дар мактабҳои Тоҷикистон 44 номгӯй китоби дарсӣ бо теъдоди тақрибан 500 ҳазор нусха намерасад.
