Гурӯҳи ҷосусии "Nomadic Octopus" шабакаи як ширкати телекоммуникатсионии Тоҷикистонро рахна карда, тавассути компютерҳо фаъолияти сохторҳои давлатиро пайгирӣ мекард.
Дар ин бора дар ҳисоботи Гурӯҳи таҳқиқотии Prodaft-и Швейтсария маълумот дода мешавад, ки рӯзи 27 апрел нашр шудааст.
Дар он гуфта мешавад, хакерҳо аз соли 2020 таҳти унвони "Paperbug" корҳои иктишофӣ мебаранд. Ин гурӯҳ мансабдорони воломақоми давлатӣ, хадамоти телекоммуникатсия ва иншооти муҳими ҷамъиятиро ҳадаф қарор додааст.
Муаллифон ному насаби бархе аз шахсони воломақомро нашр кардаанд, ки эҳтимол ҳадафи ин ҳмлаҳои хакерӣ қарор гирифтаанд.
Аз ҷумла, гуфта мешавад, маълумотҳо аз компютер ва дигар дастгоҳу таҷҳизоти Худоёр Худоёрзода, собиқ вазири нақлиёт, Амирхон Қурбонзода, собиқ муовини раиси вилояти Хатлон (феълан – муовини раиси шаҳри Душанбе), Саиднахш Раҳмонзода, генерал-майори милитсия, муовини вазири корҳои дохилӣ, Абдулазиз Шарифӣ, мудири шуъбаи ИДМ дар дастгоҳи иҷроияи президент, Бобишо Холзода, собиқ сардори Раёсати кишоварзӣ ва ҳифзи муҳити зист дар дастгоҳи иҷроияи президент (феълан – раиси ноҳияи Файзобод) дуздида шудаанд.
Киберҷинояткорони Octopus, аз як таъминоти барномавӣ (нармафзор)-и зараровар барои Windows истифода кардаанд. Он зери ниқоби як версияи алтернативии мессенҷери Telegram амал карда, абзори Delphi аст, ки ба ҳамлагар ҷиҳати ҷосусӣ нисбати шахсон, филтри маъълумоти махфӣ ва пайдо намудани дастрасӣ ба низомҳои сервер имкон медиҳад.
Octopus инчунин метавонад скриншоти экранро гирад, дастурҳоро аз фосилаи дур иҷро кунад ва файлҳоро аз хости сироятшуда ба сервери дурдаст бор кунад. Ҳамаи ин ба ҳамлагарон имкон медод, ки бевосита бубинанд, ки соҳибони компютер чӣ менависанд ва дар компютери худ чӣ кор мекунанд.
Муаллифони гузориш мегӯянд, ки хакерҳо метавонистанд тавассути яке аз ширкатҳои телекоммуникатсионии Тоҷикистон ба ин маълумот дастрасӣ пайдо кунанд. Дар гузориш номи ширкат, инчунин баъзе маълумоти дигар пӯшида аст (ранг карда шудааст).
Ба гуфтаи муаллифони гузориш, ин амалиёт намунаи насли нави корҳои ҷосусист. Ин ва дигар навъҳои назорат ва ҷамъоварии иттилоъ собит мекунад, ки фазои маҷозӣ (киберпространство) як таҳдиди нави амниятӣ аст.
Чунин шуморида мешавад, ки хакерҳои “Nomadic Octopus” бахше аз гурӯҳи “DustSquad” буда, аз соли 2014 ба ин сӯ фаъол аст ва асосан аз пайи шахсони ҷудогона ё дипломатҳо дар Осиёи Марказӣ, Афғонистон ва кишварҳои собиқ Иттиҳоди Шӯравӣ (СССР) ҷосусӣ мекунад.
Муаллифони гузориш зикр мекунанд, ки ба ҷамъоварии маълумот, аз ҷумла истифодаи забони русӣ дар панели идоракунӣ мусоидат мекунад.
“Аз эҳтимол дур нест, ки хакерҳо аз "Nomadic Octopus" метавонанд боз ба ин монанд амалиёт гузаронанд, то ки компютер ва мессенҷерҳои дигар мансабдорони тоҷикро рахна кунанд”, – бар ин назаранд дар Prodaft.
Мақомоти Тоҷикистон ҳоло ин гузоришро расман шарҳ надодаанд.
