Ҳукумати Исроил пас аз муҳокимаву баррасиҳои зиёд, шаби гузашта созишнома бо Ҳамос оид ба озод кардани гаравгонҳо ва оташбаси чоррӯзаро мақбул донист.
Тавре BBC бо такя ба манобеи худ дар гуруҳи Ҳамос хабар медиҳад, бар пояи ин созиши Исроил ва Ҳамос 50 гаравгони исроилӣ дар ивази 150 зану кӯдаки фаластинӣ, ки дар зиндонҳои Исроил нигоҳ дошта мешавад, озод хоҳанд шуд.
Ба гуфтаи Ҳамос, ин тавофуқ ҳамчунин имкон медиҳад, ки садҳо мошини ҳомили кумакҳои башардӯстона, лавозимоти тиббӣ ва сӯзишворӣ вориди Ғазза шаванд.
Зикр мегардад, ки Исроил гуфтааст, ки рейдҳо ва боздоштҳо дар Ғазза ҳангоми таваққуфи даргириҳо қатъ хоҳад шуд.
Ҳамос гуфт, ки дар ин танаффуси чаҳоррӯза ҳаракати ҳавоӣ дар шимоли Ғазза комилан қатъ шуда, ҳама парвозҳо дар ҷануби Ғазза ҳамарӯза аз соати 10:00 то 16:00 ба вақти маҳаллӣ қатъ карда мешаванд.
Бояд гуфт, дар хусуси созиши оташбас миёни Ҳамос ва Исроил дирӯз, 21-уми ноябр, Исмоил Ҳания, раҳбари дафтари сиёсии гурӯҳи “Ҳамос” хабар дода буд.
Хабаргузории Франс-пресс бо истинод ба манобеи худ навишт, ки “созиши оташбас наздик аст” ва бар ивази ин созиш, аз 50 то 100 нафари ғайринизомие, ки аз сӯйи гурӯҳи Ҳамос ва “Ҷиҳоди исломӣ” асир шудаанд, раҳо хоҳанд шуд. Исроил бошад ҳудуди 300 кӯдаки фаластиниро аз зиндонҳои худ раҳо хоҳад кард.
Ҷанг дар Ғазза рӯзи 7-уми октябр оғоз ёфт. Дар ҳамлаи "Ҳамос" 1200 исроилӣ кушта шуда, ҳудуди 220 ба гарав афтоданд ва ба Ғазза бурда шуданд. Дар 46 рӯзи ҷанг беш аз 13300 фаластинӣ ҷон бохтанд, ки аксари онҳо занону кӯдакон мебошанд.
