Дар яке аз мактабҳои шаҳри Душанбе ҳодисае, ки дар он хонандагон ҳамсинфашонро ба таври ғайриодӣ табрик мекунанд, ба ҷазои волидон ва омӯзгор боис гардид.
Тавре ки Раёсати ВКД дар Душанбе хабар медиҳад, санҷиш пас аз дар шабакаҳои иҷтимоӣ нашр шудани наворе, ки дар он хонандагони синфи 10-и мактаби таҳсилоти миёнаи умумии №127 дар вақти танаффус, дар дохили синфхона ба таври шӯхиомез бо истифода аз «скотч» даҳони ҳамсинфашонро маҳкам намуда, ӯро бо зодрӯзаш табрик мекунанд, сурат гирифт.
Ин навори аз ҷониби хонандагон нашршуда боиси вокунишҳои манфии шаҳрвандон дар шабакаҳои иҷтимоӣ гардид.
Гуфта мешавад, вобаста ба ҳолати мазкур нисбати омӯзгори масъул ва волидайни 6-нафар хонандагон тибқи талаботи моддаи 90 Кодекси ҳуқуқвайронкунии маъмурӣ протокол тартиб дода шуда, барои чораҷӯӣ ба суд ирсол карда шудааст.
Дар ин модда огоҳӣ ё ҷарима дар ҳаҷми аз 3 то 7 нишондиҳанда барои ҳисобҳо (1 нишондиҳанда – 72 сомонӣ) ҷазо пешбинӣ шудааст.
Қаблан низ барои табрики “ғайриодӣ”-и ҳамсинф волидони хонандагон муҷозот шуда буданд. Соли 2022 якчанд хонандагон барои табрики зодрӯз дар сари духтаре тухм шикаста буданд. Волидони “қаҳрамонон”-и навор – хонадагони синфҳои 8 ва 10-и яке аз мактабҳои пойтахт ҷазои маъмурӣ гирифтанд.
