Рӯзи 11‑уми май дар шаҳри Душанбе озмуни ҷумҳуриявии “Оилаи намунавӣ” ҷамъбаст гардид ва ғолибон муайян шуданд. Шоҳҷоизаи озмуни “Оилаи намунавӣ”‑ро оилаи Оқилбой Гадоев аз шаҳри Истиқлоли вилояти Суғд ба даст овард.
“Азия‑Плюс” бо хонаводаи Оқилбой Гадоев ҳамсӯҳбат шуд ва аз рафти озмун, ҳиссиёти онҳо ва ҳаёту фаъолияти ин хонавода маълумот ба даст овард.
Оқилбой Гадоев ва ҳамсараш Чевар Муродова 41 сол пеш бо ҳамдигар издивоҷ кардаанд. Онҳо соҳиби чаҳор фарзанд ва нӯҳ набера мебошанд. Ҳардуяшон омӯзгор ҳастанд.
Оқилбой Гадоев 41 сол аст, ки ҳамчун омӯзгори фанни забон ва адабиёти тоҷик ба толибилмон дарс мегӯяд. Ӯ дар зикр кард, ки бо маоши омӯзгорӣ чаҳор фарзанди худро соҳибмаълумот кардааст ва ҳар кадоме дар зиндагӣ мавқеи худро пайдо кардаанд.
“Яке аз шартҳои озмун ин сафарбаркунии фарзандон ба хидмати ҳарбӣ буд. Ҳар се писарам баъди хатми донишгоҳ бо тавсияи мо ба хидмати ҳарбӣ рафтанд. Баъди адои хидмат онҳоро хонадор кардем, ки арӯсҳоямон низ ҳамаашон маълумоти олӣ доранд”, ‑ гуфт ӯ.
Оқилбой Гадоев мегӯяд, ки барои иштирок дар озмуни “Оилаи намунавӣ” маълумотнома дар бораи аҳли оила, дипломҳои аҳли хонавода, шаҳодатномаи хидмати ҳарбии худу фарзандон, ҳуҷҷатҳо дар хусуси иштирок дар озмунҳои ҷумҳуривӣ, диплому ҷоизаҳои бадастовардаи аъзои хонавода ва ғайраро пешниҳод намудааст. Дар идома ҳайати коммисия бо онҳо ҳамсӯҳбат шудаанд ва асоснокии ҳуҷҷатҳояшонро санҷидаанд.
Оқилбой Гадоев ва ду фарзандаш дар озмуни ҷумҳуривии “Фӯрӯғи субҳи доноӣ” дар солҳои 2022‑2023 иштирок карда ва ҷойҳои ифтихориро соҳиб гаштаанд.
“Бурди шоҳҷоизаро интизор набудем, ҳисси ғолибият аҷиб аст. Вақте суханро ба ман доданд, аз ҳаяҷони зиёд чӣ гуфтанамро надонистам”, ‑ гуфт Оқилбой Гадоев.
Бо ғолибони озмун туҳфаи хотирмон ва диплом аз ҷониби Кумитаи кор бо занон ва оила, ки ташкилкунандаи озмун аст, тақдим гардидааст.
Ёдовар мешавем, ки озмуни ҷумҳуриявии “Оилаи намунавӣ” дар се марҳила шаҳрӣ, вилоятӣ ва ҷумҳуриявӣ баргузор шуд.
Ҳамчунин, ба иттилои АМИТ “Ховар” ҷойи якум ба оилаи Талабхӯҷа Нозимов аз шаҳри Кӯлоб, ҷойи дуюм ба оилаи Саидаҳмад Шеров аз ноҳияи Исмоили Сомонии шаҳри Душанбе ва оилаи Шоин Мастонов аз ноҳияи Роштақалъаи ВМКБ насиб гардидааст.
Ғолиби мақоми сеюм хонаводаи Муқимҷон Гиёев аз ноҳияи Рашт, оилаи Ҳабибулло Султонов аз ноҳияи Рӯдакӣ ва Бобоназар Мирзоев аз ноҳияи Файзобод мебошанд.
Бояд қайд намуд, ки ғолибон аз рӯйи низомномаи зеррин муайян шуданд:
– солимии оила дар муносибатҳои оилавӣ;
– тарбияи дурусти фарзандон;
– саҳми оила дар ободонии хона, кӯча, шаҳрак, маҳалла, деҳот ва ҷамоат;
– нақши оила дар ҳифзи арзишҳои фарҳанги миллӣ;
– шароити мусоиди муҳайёгардида барои таълиму тадриси фарзандон;
– забондонӣ ва иштироки фарзандон дар озмунҳои ҷумҳурӣ, чорабиниҳои фарҳангӣ ва варзишӣ;
– ҷалби фарзандон ба хизмати ҳарбӣ;
– ва саҳми оила дар пешгирии омилҳои номатлуби ҷомеа.
Дар анҷоми маросими ҷоизасупории озмуни “Оилаи намунавӣ” барномаи фарҳангӣ бо иштироки аҳли санъат ва ҳунар баргузор гардидааст.
