Зиёда аз 300 нафари ҷонбохтагон ноболиғони то 16-сола будаанд.
Ғарқшавии сокинон дар кӯлу дарёҳо яке аз мушкилҳои ҷиддӣ дар Тоҷикистон боқӣ мемонад ва боз ҳам ташвишовартар ин аст, ки беш аз 30 дарсади ҷонбохтагон ноболиғони то 16-сола мебошанд.
Аз Кумитаи ҳолатҳои фавқуллода ва мудофиаи граждании кишвар ба ОИ “Азия-Плюс” хабар доданд, ки бештари шаҳрвандон дар ҷойҳои бидуни шароити мусоид ва мамнӯъ оббозӣ мекунанд ва ғарқ мешаванд. Сабаби ҳалокати теъдоди зиёди кӯдакон беназорат гузоштани онҳо ва шиноварӣ натавонистан будааст.
Тибқи иттилои ин ниҳод, танҳо дар панҷ моҳи соли ҷорӣ, дар дарёву обанборҳои кишвар 50 нафар ҷон бохтаанд, ки 20 нафари онҳо кӯдакону наврасон мебошанд.
Ҳалокати сокинон дар кӯлу дарёҳо давоми панҷ соли охир (2019-2023)
Дар умум, давоми панҷ сол (2019-2023) дар кӯлу дарёҳои кишвар бо шумули кӯдакону наврасон 747 нафар ғарқ шудаанд.
Бо қоидаҳои бехатарӣ ҳангоми оббозӣ дар ин матлаб шинос шавед.
Кумитаи ҳолатҳои фавқулода ва мудофиаи гражданӣ шаҳрвандон ва меҳмонони кишварро ба андешидани чораҳои эҳтиётӣ, риояи қоидаҳои бехатари ҳангоми оббозӣ ва пешгирӣ аз амалҳои хатарнок барои пешгирӣ аз фоҷиа даъват мекунад. Аммо омор бозгӯи он аст, ки на ҳамеша тавсияҳо шунида ва ба назар гирифта мешаванд.
