Дар Душанбе рӯзи 17 сентябр бори аввал чорабиние бо номи Speed ProF Dating (Дидори кӯтоҳмуддати корозмудагон) баргузор гардид. Дар ҷараёни он шахсон аз соҳаҳои гуногун гирдиҳам омада, корфармоён бо довталабони эҳтимолӣ шинос шуданд.
Чорабинӣ бо ташаббуси мураббии рушди шахсӣ ва лайф-коуч Мунира Исомова, шоир ва стендап-ҳаҷвнигор Ҳабибҷон Баҳриддинов созмон дода шуда, аз ҷониби гастро-бари Community дастгирӣ ёфт.
Тавре ки хабарнигори «Азия-Плюс», ки дар чорабинӣ ҳузур дошт, хабар медиҳад, иштирокчиён фаъолона суҳбат карда, ҳамкориҳои ояндаро дар гуфтугӯҳои кӯтоҳмуддат баррасӣ карданд.
Ба ҳар кадоме аз иштирокчӣ ҳамагӣ панҷ дақиқа ҷудо мешуд, то худро ба корфармои эҳтимолӣ ё довталаб муаррифӣ кунад, вале ин вақт барои барқарор кардани робитаҳои аввалия басанда буд. Иштирокчиён ҳадафҳои гуногун доштанд: бархе кормандони соҳибихтисос меҷустанд, дигарон талош мекарданд, ки кори ҷолиб пайдо кунанд ва бархеи дигар барои роҳандозии робитаҳои тиҷоратӣ ва васеъ кардани доираи шиносҳо омада буданд.
Ҳар як гуфтугӯи панҷдақиқагӣ дар чорабинӣ муфид ва пурмазмун буд. Яке мутахассиси лозима ва дуюмӣ – корфармои мувофиқ дарёфта, бархе ҳатто шарикони нави тиҷоратӣ пайдо карданд. Масалан, яке аз иштирокчиён дар соҳаи логистика изҳор дошт, ки бо намояндаи як ширкати дорусозӣ шинос шуда, онҳо аллакай дар бораи ҳамкориҳои оянда ба мувофиқа расиданд.
Бисёре аз иштирокчиён низ зикр карданд, ки ин тарзи дидору гуфтугӯ назар ба суҳбатҳои маъмулӣ хеле қулайу шавқовартар аст. Дар муҳити ғайрирасмӣ одамон худро озодтар ҳис карда, дар бораи худ бештар маълумот медиҳанд.
Вохӯрӣ бо машғулияти ҷолиб аз ҷониби худи Мунира Исомова анҷом ёфт. Ба иштирокчиён варақа ва лифофаҳо дода шуданд, ки дар онҳо бояд хоҳиш ё паёме барои касе навишта мешуд. Баъдан ҳамаи навиштаҳоро ҷамъ оварда, онҳоро омехта карданд ва ҳар як иштирокчӣ яке аз онҳоро гирифт, то паёми ғайриинтизореро барои худ дарёфт кунад. Иштирокчиён бо рӯҳияву илҳоми саршор изҳор доштанд, ки бесаброна чорабинии ояндаро интизор хоҳанд шуд.
