Додгоҳе дар Санкт-Петербург як шаҳрванди Русияро барои нашри хабарҳое, ки ҳамлаи террористӣ дар “Крокус Сити Холл”-ро сафед мекард, 600 ҳазор рубл ҷарима кардааст.
Дар ин бора хабаргузории ТАСС дар такя ба Дафтари матбуоти додгоҳҳои Санкт-Петербург хабар додааст.
Ба иттилои манбаъ, Додгоҳи якуми ҳавзаи ғарбии Санкт-Петербург нисбати Николай Конашенко, муаллифи хабарҳое, ки ҳамлаи террористӣ дар “Крокус Сити Холл” дар вилояти Маскавро сафед мекардааст, 600 ҳазор рубл ҷарима ва барои ду сол аз идораи сомонаҳо маҳрум кардааст.
Мурофиаи додгоҳӣ бо дархости вакил пушти дарҳои баста баргузор шудааст.
“Нисбати ӯ мутобиқи моддаи 205.2, қисми 2 (сафедкунии оммавии терроризм) – и Кодекси ҷиноии Русия парванда боз шуда, додгоҳ нисбати ӯ то 25-уми май ҳасбро пешбинӣ карда буд”,-навиштааст манбаъ.
Тибқи иттилои расмӣ, номбурда 25-уми марти соли 2024 ҳангоме, ки мехостааст Русияро тарк кунад дар фурудгоҳи Пулково боздошт шудааст.
Манбаъ навиштааст, ки дар наворе, ки Сарраёсати ВКД-и Санкт-Петербург нашр кардааст боздоштшуда иқрор шудааст, ки дар шабакаи иҷтимоии Фейсбук ҳамлаи террористӣ дар “Крокус сти Холл”-ро сафед кардааст.
Ин бори аввал нест, ки як нафарро барои сафедкунии ҳамла ба “Крокус” ҷазо медиҳанд.
Моҳи марти соли гузашта дар шаҳри Санкт-Петербурги Русия Баҳодур Зуҳурови 26-солаи шаҳрванди Тоҷикистонро бо гумони “сафедкунии терроризм” боздошт карданд. Тибқи фарзияи мақомоти тафтишот, ӯ дар як замимаи гуфтугӯии шабакаи Телеграм навори ҳамла ба “Крокус”-ро нашр кардааст, ки дар он аломатҳои сафедкунии терроризм дида мешаванд. Нисбати ӯ чӣ ҷазо таъин шуд, ҳоло маълум нест.
Ҳамла ба толори консертии “Крокус сити ҳолл” дар вилояти Маскав рӯзи 22-юми марти соли 2024 рух дод ва дар ҷараёни ин ҳамла, ба иттилои расмӣ, 146 тан кушта ва 551 каси дигар захмӣ шуданд.
Тибқи иттилои Кумитаи тафтишоти Русия дар пайи амалиёти мақомоти Русия дар умум дар доираи ин парванда 19 нафар ба ҷавобгарӣ кашида шудаанд. Миёни боздоштшудҳо чанд шаҳрванди Тоҷикистон ҳам ҳастанд.
Ҳамчунин, хисороти ҳамлаи террористӣ ба Крокус 6 миллиард рубл ҳисоб шудааст.
