Дар Минтақаи озоди иқтисодии "Кӯлоб" бо дастгирии ширкати “Samil PwC”-и Кореяи Ҷанубӣ Маркази логистикӣ бунёд мешавад. Дар ин бора Азим Иброҳим, вазири нақлиёти Тоҷикистон бо Ок Донг Ю, намояндаи ин ширкат ва мудири лоиҳаи Асосноккунии техникӣ-иқтисодии таъсиси ин марказ мулоқот кардааст.
Ба иттилои Вазорати нақлиёти Тоҷикистон, лоиҳа, ки дар шафати шоҳроҳи байналмилалии "Душанбе-Кӯлоб-Хоруғ-Қулма" ҷойгир аст, имкон медиҳад, ки ин марказ ҳамчун маркази логисткии минтақавӣ хизмат намуда, ба он тавассути долони чандваҷҳӣ (мултимодалӣ)-и "Чин-Тоҷикистон-Ӯзбекистон-Туркманистон-Эрон-Туркия ва кишварҳои Аврупо" молу коло интиқол дода шавад.
Азим Иброҳим, вазири нақлиёти Тоҷикистон зимни мулоқот лоиҳаи таъсиси Маркази логистикиро муҳим хонда, таъкид кардааст, ки лоиҳаи мазкур бо шумули лоиҳаи муқаддимавӣ ва "Basic Design" барои рушди низоми логистика ва беҳбуди имконоти логистикии Тоҷикистон аҳаммияти стратегӣ дорад.
Ба навиштаи манбаъ, дар Тоҷикистон сохтмону таҷдиди роҳҳои оҳан ва мошингард, нақбу пулҳо ва дигар зерсохтҳои зарурӣ барои ба кишвари ҷолиби транзитии минтақа табдил додани ҷумҳурӣ идома дорад.
“Аммо бе мавҷуд будани марказҳои логистикии муосир ва дар маҷмуъ инфрасохтори логистикии зарурӣ ин кор душвор аст, – омадааст дар хабари Вазорат. – Аз ин лиҳоз, лоиҳакашӣ ва таъсиси марказҳои логистикӣ дар кишвар амри муҳим ва талаботи замон арзёбӣ мешавад”, — навиштааст манбаъ.
Ҳамчунин, Ок Донг Ю, мудири ин лоиҳа дар бораи раванди татбиқи лоиҳа ва корҳое, ки дар доираи он ба нақша гирифта шудаанд, маълумот додааст.
"Samil PwC" (Samil PricewaterhouseCoopers или PwC Korea) ширкати бузурги хадамот дар Кореяи Ҷанубӣ мебошад, ки дар соҳаҳои аудит, машварат дар соҳаи андоз ва тиҷорат хидматрасонӣ пешниҳод мекунад. Он ширкати узви шабакаи ҷаҳонии "PricewaterhouseCoopers" (PwC) – яке аз бузургтарин иттиҳодияи байналмилалии ширкатҳо оид ба аудит ва хадамоти машваратӣ маҳсуб меёбад.
