Фонди Абу-Забӣ оид ба рушди Имороти Муттаҳидаи Арабӣ барои идомаи сохтмони НБО “Роғун” ба Тоҷикистон 100 млн доллар қарз медиҳад. Тибқи созишнома, фоизи солонаи қарзи ҷалбшуда 2,5% буда, дар 17 сол бояд баргардонида шавад.
Вакилони парлумони Тоҷикистон созишномаи мазкурро рӯзи 25-уми феврал дар иҷлосияи Маҷлиси намояндагон баррасӣ ва қабул кардаанд.
Файзиддин Қаҳҳорзода, вазири молияи кишвар зимни муаррифии созишнома гуфтааст, ки ҳаҷми умумии қарз 376,3 млн дирҳам, баробар ба 100 млн доллар буда, “он ба муҳлати 17 сол, бо чор соли давраи имтиёзӣ ва бо меъёри 2,5% солона ҷалб карда мешавад”.
“Созишномаи қарзӣ бо тартиби муқарраргардида 4-уми феврали соли ҷорӣ дар шаҳри Дубайи Аморот (Иморот)-и Муттаҳидаи Араб ба имзо расонида шуд ва он барои маблағгузории лоти 2-и Нерӯгоҳи барқи обии “Роғун” равона карда мешавад”-, гуфтааст вазир.
Қаблан, Созишномаи молиявӣ миёни ҳукумати Тоҷикистон ва бонки мазкурро рӯзи 4-уми феврал Файзиддин Қаҳҳорзода, вазири молияи Тоҷикистон ва Муҳаммад Сайф, раҳбари Фонди Абу-Забӣ дар шаҳри Дубай имзо кардаанд.
Чанде пеш Қаҳҳорзода дар нишасти матбуотии 14-уми феврал гуфта буд, ҷиҳати таъмини молиявии бунёди НБО “Роғун” бо чандин донорҳои байналмилалӣ ба маблағи умумии 812 млн доллар созишномаҳо имзо шудаанд, ки 462 млн доллари он қарз ва 350 миллион доллар грант мебошад.
Вазир гуфт, фоизи қарзҳои ҷалбшуда паст ва он дарозмуддат, аз 25 то 30 сол, мебошанд, ки “пас аз амалӣ кардани лоиҳаи “Роғун” ин маблағҳо ба қарздиҳандагон дар вақташ баргардонида мешаванд”.
Бояд гуфт, Эмомалӣ Раҳмон, раисҷумҳури кишвар зимни ироаи паём ба парлумони кишвар гуфта буд, ки ҳукумат барои таъмини маблағгузории саривақтии НБО “Роғун”, тадбирҳои доимӣ андешада аз тамоми манбаъҳо истифода намояд.
“Дар ин робита ҳамкорӣ бо як қатор ташкилотҳои молиявии байналмилалӣ ва шарикони рушди мо барои ҷалби маблағҳои фоизӣ ба ҳаҷми 33 миллиард сомонӣ ё 3 миллиард доллар, ки аз ин миқдор 12,5 миллиард сомонӣ ё 1 миллиард 150 миллион доллар грант мебошад, ба роҳ монда шудааст”, – таъкид гардид дар паём.
Дар умум, барои идомаи сохтмони нерӯгоҳи “Роғун” беш аз 40 млрд сомонӣ (4 млрд доллар) ҷудо гардидааст. Барои анҷоми комили лоиҳаи НБО “Роғун” то соли 2035 дар умум 6,4 миллиард доллар зарур аст.
НБО “Роғун” аз бузургтарин лоиҳаи истеҳсоли барқ дар минтақаи Осиёи Марказӣ буда, сохтмони он беш аз даҳ сол ин ҷониб идома дорад. То ин лаҳза ду чархаи НБО “Роғун” ба кор андохта шудааст ва чархаи сеюми он соли ҷорӣ бояд ба кор дарояд. Дар умум, ин нерӯгоҳ 6 чарха дорад ва иқтидори умумии он 3600 МВт мебошад.
Мавриди баҳрабардорӣ қарор додани агрегати охирини неругоҳ соли 2029 дар назар аст. Анҷоми пурраи корҳои сохтмон дар нерӯгоҳ соли 2033 пешбинӣ шудааст.
