Федератсияи футболи Тоҷикистон (ФФТ) тасдиқ кард, ки Горан Стеванович, мутахассиси 58-солаи сербистонӣ аз вазифаи сармураббии тими миллии кишвар канор рафтааст. Ин ниҳод 15-уми апрел сабаби тарки даста кардани Стевановичро ба тамом шудани муҳлати шартномааш рабт дод.
“Федератсияи футболи Тоҷикистон ба Горан Стеванович барои саҳм дар рушди дастаи миллӣ изҳори сипос намуда, ба ӯ дар фаъолияти минбаъдаи мураббигӣ барору комёбиҳо орзу мекунад”, – гуфтааст ФФТ.
Ба гуфтаи манбаъ, “дар мавриди таъйини сармураббии нави дастаи мунтахаби Тоҷикистон маълумот дертар нашр мешавад”.
Қаблан расонаҳо аз рафтани Стеванович аз тими миллии Тоҷикистон хабар дода, сабаби онро ба созиш нарасидани мураббӣ бо Федератсияи футболи Тоҷикистон дар бораи тамдиди шартнома гуфта буданд.
Стеванович тирамоҳи соли 2025 сармураббии тими миллии Тоҷикистонро ба ӯҳда гирифта буд. Таҳти роҳбарии ӯ даста чор бозӣ анҷом дод, ки дар се бозӣ пирӯз шуда, як бозиро мусовӣ анҷом дод. Бо ин натиҷа даста соли оянда ба Ҷоми Осиё -2027 меравад.
Дар бораи корномаи Стеванович дар ин маводи мо маълумот гиред: Горан Стеванович чӣ корнома дорад?
