Home Blog Page 47

ФАВРӢ! Алии Хоманаӣ, роҳбарии олии Эрон кушта шудааст

By
admin
-
0

Алии Хоманаӣ, раҳбари Ҷумҳурии Исломии Эрон дар пайи ҳамлаи Исроилу Амрико ба ин кишвар кушта шудааст. Дар ин бора хабаргузории "ИРНА" такя ба Шӯрои олии амнияти миллии Эрон иттилоъ додааст.

Манбаъ менависад, ки Алии Хоманаӣ субҳи 28-уми феврал дар маҳалли кораш ҳангоми иҷрои вазифа кашта шуд. Ӯ 86 сол дошт ва 37 сол пеш,  пас аз марги Оятуллоҳ Хумайнӣ, бундёгузори Ҷумҳурии исломӣ ба мақоми раҳбари олии Эрон расида буд.

"Ҳазрати Оятуллоҳ Хоманаӣ, раҳбари бузурги инқилоби исломӣ, рӯзи шанбе, 28 феврал, дар ҳамлаи субҳ аз ҷониби режими саҳюнистӣ (Эрон Исроилро чунин ном мебарад, аз идора) ва Иёлоти Муттаҳида ба шаҳодат расиданд", – навиштааст ИРНА.

Ҳамчунин, ба навиштаи хабаргузории "Форс", духтар, домод ва набераи Алии Хоманаӣ низ кушта шудаанд. Ин расона илова кардааст, ки яке аз келинҳои ӯ низ ҷон бохтааст.

Қаблан дар бораи кушта шудани Алии Хоманаӣ, Доналд Трамп , расиҷумҳури Амрико хабар дода буд. 

Дар пайи кушта шудани Алии Хоманаӣ дар Эрон 40 рӯз мотам ва 7 рӯз таътили умумӣ эълон шуд. 

МАТЕРИАЛЫ ПО ТЕМЕ
Ҳамлаи Амрико ва Исроил ба Эрон. Сафорати Тоҷикистон ба шаҳрвандононаш тавсия дод, ки Эронро тарк кунанд

Дар ҳамин ҳол, расонаҳо аз кушта шудани чанд фармондеҳи олии артиши Эрон, аз ҷумла, Алии Шамхонӣ, дабири Шӯрои амнияти Эрон, Муҳаммад Покпур, фармондеҳи кулли Сипоҳи посодорони инқилоби исломӣ, Азиз Носирзода, вазири дифоъи Эрон низ хабар медиҳанд. Вале мақомоти Эрон то ҳол ин хабарҳоро тасдиқ ё рад накардаанд. 

Ёдовар мешавем, ки ҷанги нав дар Ховари миёна субҳи дирӯз, 28-уми феврал бо ҳамлаи Амрико ва Исроил ба Эрон оғоз шуд. Дертар артиши Эрон ҳам дар посух ба ин ҳамлаҳо ба Исроил ва пойгоҳҳои Амрико дар кишварҳои арабӣ ҳамла кард.

Раисҷумҳури Амрико ва сарвазири Исроил дар изҳороти худ ошкор иброз доштанд, ки ҳадафи ҷанг сарнагунсозии низоми ҷорӣ дар Эрон аст. Эрон посух дод, ки ба ҳар гуна таҷовуз сазовор ва қотеъ посух хоҳад гуфт.

Вазорати корҳои хориҷии Тоҷикистон дар робита ба ҳамлаи Амрикову Исроил ба Эрон то ҳол баёнияи расмие нашр накардааст. Вале сафорати Тоҷикистон дар Эрон бо пашхи як баёния ҳамлаи Амрикову Исроил ба Эронро “амалиёти низомӣ” хонда, шаҳрвандони кишвар тавсия дод, ки ин кишварро “бо истифода аз имконоти дастрас тарк намоянд”.

Дар ҳамин ҳол, парвозҳо аз Тоҷикистон ба Эрон бекор шудаааст. 

Ҳоло вазъ дар Эрон ва кулли минтақа печида ва ташвишовар боқӣ мемонад.

Дар Telegram, Facebook ва Instagram бо мо бимонед.

Ҳамлаи Амрико ва Исроил ба Эрон. Сафорати Тоҷикистон ба шаҳрвандононаш тавсия дод, ки Эронро тарк кунанд

By
admin
-
0

Дар пайи ҳамлаи Амрикову Исроил ба Эрон Сафорати Тоҷикистон дар Теҳрон ба шаҳрвандони кишвар тавсия дод, ки ин кишварро “бо истифода аз имконоти дастрас тарк намоянд”.

Изҳороти Сафорати Тоҷикистон дар Теҳрон чанд лаҳза пеш дар саҳифаи он дар Фейсбук нашр шуд.

Сафорати Тоҷикистон дар Теҳрон ҳамлаи Амрикову Исроил ба Эронро “амалиёти низомӣ” хонда, ба шаҳрвандони Тоҷикистон дар Эрон тавсия додааст, ки “оромиро нигоҳ доранд, ҳушёр ва бодиққат бошанд, пайваста иттилоот ва тавсияҳои расмии Сафорат ва мақомоти Эронро пайгирӣ намоянд, аз будубош дар наздикии иншооти ҳарбӣ ва давлатӣ худдорӣ кунанд, инчунин аз аксбардорӣ ва наворбардорӣ дар тамоми ҳудуди кишвар парҳез намоянд”.

Ҳамчунин, Сафорат ба шаҳрвандони Тоҷикистон дар Эрон тавсия додааст, ки ин кишварро “бо истифода аз имконоти дастрас тарк намоянд”.

Дар изҳороти Сафорат зикр шудааст, ки он “фаъолияти худро дар низоми муқаррарӣ идома дода, омода аст барои мусоидат дар ҳалли масъалаҳои вобаста ба хориҷшавии шаҳрвандон аз Эрон кумак расонад”.

Ва барои тамос рақамҳои зеринро гузоштааст:

+98 (021) 22 29 95 84
2. +98 (021) 22 83 46 50
3. +98 936 325 31 47
4. +98 910 451 98 15
5. +98 937 974 35 08
6. +98 930 433 42 34

Вазорати корҳои хориҷии Тоҷикистон дар робита ба ҳамлаи Амрикову Исроил ба Эрон то ҳол баёнияи расмие нашр накардааст.

Зимнан, вақти “ҷанги 12-рӯза”-и Исроилу Амрико бо Эрон дар тобистони соли 2025 Тоҷикистон аз аввалин кишварҳое буд, ки онро қотеъона маҳкум карда буд.

МАТЕРИАЛЫ ПО ТЕМЕ
Вазорати корҳои хориҷии Эрон: “Бо иқтидор ҷавоби таҷовузкоронро медиҳем”

Дар ҳамин ҳол, парвозҳо аз Тоҷикистон ба Эрон бекор шудаааст. 

Аз ҷумла як парвози ширкати "Вориш", ки мебоист  пагоҳ аз Теҳрон ба Душанбе парвоз кунад, лағв шудааст. Дар ин бора як манбаъ аз бахши ҳавонавардии кишвар ба “Азия-Плюс” хабар дод. 

Ҳамчунин, ба иттилои манбаъ, субҳи имрӯз, 28-уми феврал, як ҳавопаймо, ки аз Душанбе ба самти Дубай парвоз мекард, дар пайи ҳамлаҳои Эрон ба пойгоҳҳои амрикоӣ ва маҳдуд шудани фазои ҳавоии Имороти Муттаҳидаи Арабӣ аз марзи Туркманистон аз роҳ баргашт ва тавассути Покистон дубора ба Душанбе омад.

Ёдовар мешавем, ки ҷанги нав дар Ховари миёна субҳи имрӯз бо ҳамлаи Амрико ва Исроил ба Эрон оғоз шуд. Дертар артиши Эрон ҳам дар посух ба ин ҳамлаҳо ба Исроил ва пойгоҳҳои Амрико дар кишварҳои арабӣ ҳамла кард.

Раисҷумҳури Амрико ва сарвазири Исроил дар изҳороти худ ошкор иброз доштанд, ки ҳадафи ҷанг сарнагунсозии низоми ҷорӣ дар Эрон аст. Эрон посух дод, ки ба ҳар гуна таҷовуз сазовор ва қотеъ посух хоҳад гуфт.

Дар Telegram, Facebook ва Instagram бо мо бимонед.

Вазорати корҳои хориҷии Эрон: “Бо иқтидор ҷавоби таҷовузкоронро медиҳем”

By
admin
-
0

Вазорати корҳои хориҷии Эрон пас аз чанд соати оғози ҳамлаи Исроил ва Амрико ба хокаш расман изҳори назар кард ва гуфт, “ба таҷовузгарон бо иқтидор ҷавоб медиҳад”.

Дар изҳороти ин ниҳод ҳамлаи Амрико ва Исроил “таҷовузи низомӣ” хонда ва маҳкум шудааст.

“Таърих гувоҳ аст, ки эрониён ҳеҷ гоҳ дар баробари таҷовузи бегонагон сари таслим фуруд наовардаанд. Ин маротиба ҳам посухи миллати Эрон, қатъӣ ва таъинкунанда хоҳад буд ва таҷовузгаронро аз амалҳои муҷримонаи худ пушаймон хоҳад сохт”, – гуфтааст манбаъ.

ВКХ-и Эрон илова кардааст, ки ҳамлаи Амрико ва Исроил ба Эрон нақзи Оинномаи Созмони миллали муттаҳид ва таҷовузи мусаллаҳонаи ошкор алайҳи Эрон аст.

“Посух ба ин таҷовуз, ҳаққи қонунии Эрон аст ва тибқи моддаи 51 Ойинномаи СММ, нирӯҳои мусаллаҳи Ҷумҳурии Исломии Эрон аз ҳамаи имконот ва қудраташон барои муқобила бо ин таҷовузи ҷинояткорона ва рафъи бадиҳои душман истифода хоҳанд кард”, – омадааст дар изҳороти ин ниҳод.

ВКХ-и Эрон изҳор доштааст, ки Амрико ва Исроил дар остонаи Наврӯз, дар даҳумин рӯзи моҳи мубораки Рамазон ва дар ҳоле, ки музокироти Эрон ва Амрико ҷараён дошт, “бо нақзи ошкорои тамомияти арзӣ ва ҳокимияти миллӣ, як силсила аз ҳадафҳо ва зерсохтҳои дифоиву ғайринизомӣ дар шаҳрҳои мухталифи кишварро мавриди ҳамла қарор доданд”.

Ин ниҳод аз кишварҳои исломӣ ва давлатҳои узви СММ-ву минтақа даъват кардааст, ки ҳамлаҳои Амрико ва Исроил ба Эрон маҳкум карда, алайҳи он иқдоми оҷилу дастаҷамъӣ андешанд.

 

Посухи Эрон: Таркишҳо дар пойгоҳҳои Амрико дар кишварҳои арабӣ

Расонаҳои ҷаҳонӣ хабар медиҳанд, ки дар пайи ҳамлаи Амрикову Исроил ба хоки Эрон, Ҷумҳурии Исломӣ ба пойгоҳҳои Амрико дар кишварҳои Халиҷи форс – Баҳрайну Аморати Муттаҳидаи Араб, Урдуну Арабистони Саудӣ, Кувайту Қатар ҳамлаи мушакӣ анҷом додааст.

Хабаргузории эронии “Форс” навиштааст, ки ҳамлаҳои мушакӣ ба пойгоҳи ҳавоии “Ал-Удайд” дар Қатар, пойгоҳи ҳавоии “Алӣ ас-Салим” дар Кувайт, пойгоҳи ҳавоии “Аз-Зафра” дар Имороти Муттаҳидаи Арабӣ, қароргоҳи "Новгони Панҷум”-и Амрико дар Баҳрайн анҷом шуд.

Ҳамчунин, “AFP” аз шунидани садои таркиш дар шаҳри Риёзи Арабистони Саудӣ хабар медиҳад.

Ба навиштаи "Ал-Ҷазира", мақомоти Баҳрайн ҳадаф қарор гирифтани маркази фармондеҳии "Новгони Панҷум”-и Амрико дар ин кишварро тасдиқ кардааст.

Дар мавриди паёмадҳои ин ҳамлаҳо то ҳол иттилое дастрас нест.

Дар ҳамин ҳол, ба навиштаи ББС, Вазорати дифои Қатар муддаӣ шудааст, ки ҳамаи мушакҳои партобшуда аз Эронро сарнагун кардааст.

Пештар аз ин Эрон борҳо гуфта буд, ки ҳадафи ҳамлаҳоии ҷавобии Эрон "ҳамаи пойгоҳҳои низомии амрикоӣ дар минтақа" хоҳанд буд. Ин нуктаро имрӯз Вазорати дифои Эрон борӣ дигар таъкид кард.

 

Аввалин гузоришҳо аз кушташудагони ҳамлаи Амрикову Исроил

Ахиран хабаргузориҳои Эрон аз паёмадҳои ҳамлаи Амрикову Исроил ба Эрон хабар доданд. Хабаргузории "Меҳр" навишт, ки дар пайи ин ҳамлаҳо беш аз 20 донишомӯз кушта шуда, 45 тани дигар ҷароҳат бардоштанд.

Мақомоти Эрон то ин лаҳза омори кушташудагону ҷароҳатбардоштагонро расман эълон накардааст. Танҳо вазорати беҳдошти ин кишвар хабар дод, ки бемористонҳо дар ҳолати омода бошанд.

Бояд гуфт, Амрикову Исроил ба чанд шаҳри Эрон, аз ҷумла Теҳрон, Исфаҳон, Қум ҳамла кард. 

То ҳол сарнавишти Алии Хоманаӣ, роҳбари олии Эрон номаълум аст. Ҳеҷ як расонае дар бораи макони будубоши ӯ хабар надодаанд. Расонаҳои ҷаҳон навиштанд, ки ҳадафи аслии мавҷи аввали ҳамлаи Исроилу Амрико ба Эрон маконҳои мақомдорони радаи аввали Ҷумҳурии Исломӣ буд.

Дар ҳамин ҳол, писари Масъуд Пизишкиён, раисҷумҳури Эрон ба расонаҳо гуфт, ки падараш зинда аст. Ҳамчунин, дар бораи ҳамла ба хонаи Маҳмуд Аҳмадинажод, раисҷумҳури пешини Эрон ҳам гузоришҳо нашр шуд, аммо ҳеҷ як манбаъ аз сарнавишти ӯ дақиқ маълумот надодаанд. Аммо гуфта мешавад, ки мақомдорони аршади Эрон саломатанд ва дар ҷойи амнанд. Танҳо аз кушта шудани фармондеҳи аршади Артиши Эрон хабар дода мешавад.

Эмомалӣ Раҳмон фармони даъвати баҳорӣ ба артишро имзо кард

By
admin
-
0

Эмомалӣ Раҳмон, раисҷумҳури Тоҷикистон фармон дар бораи даъвати баҳорӣ ба артишро имзо кард. Бар асоси он, ҷавонони аз 18 то 27-сола (солҳои таваллуди 1999-2008) аз 1-уми апрел то 31-уми май дар ин давра ба сафи Қувваҳои мусаллаҳ ҷалб мешаванд.

Дар фармон, ки имрӯз, 28-уми феврал дар сомонаи раисҷумҳур нашр шуд, гуфта мешавад, онҳое, ки хидмати ҳарбиро тамом карданд, дар моҳҳои апрел-майи соли 2026 аз сафи Қувваҳои мусаллаҳи кишвар “ба эҳтиёт рухсат дода шаванд”.

Эмомалӣ Раҳмон раисони шаҳру ноҳияҳо ва комиссариатҳои ҳарбиро вазифадор кардааст, ки “даъвати муташакилонаи шаҳрвандонро бо дарки масъулият” ба хидмати ҳарбӣ ба роҳ монанд.

Ҳамчунин, Вазорати фарҳанг, Кумитаи кор бо ҷавонон ва варзиш ва Кумитаи телевизион ва радио вазифадор кардааст, ки омодагӣ ва рафти даъвати шаҳрвандонро ба хидмати ҳарбӣ ба таври густурда инъикос карда, хидмати ҳарбиро “ҳамчун вазифаи муқаддаси ҳар як шаҳрванд”-и Тоҷикистон” тарғиб кунанд.

Дар ин баробар Вазорати тандурустӣ вазифадор шудааст, ки барои муоинаи назоратии тиббии даъватшавандагон табибону мутахассисони ботаҷрибаро сафарбар кунад.

Ёдовар мешавем, ки соли гузашта фармони даъвати баҳорӣ нисбат ба солҳои пешин, барвақттар- нимаи дуввуми моҳи феврал нашр шуда буд. Маъмулан фармони президент дар авоили моҳи март нашр мешавад.

Дар Telegram, Facebook ва Instagram бо мо бимонед.

Хабари муҳим барои ронандагони воситаи нақлиёт: Оғози ҷаримаи худкор барои надоштани суғуртаи ҳатмӣ ва муоинаи техникии мошин

By
admin
-
0

Дар Душанбе, минбаъд ба таври худкор мавҷудияти суғуртаи ҳатмӣ ва муоинаи техникии нақлиёт тариқи дурбин ва суръатсанҷ санҷида мешавад. Дар сурати набудани он, ба ронанда барои ҳалли камбудӣ 10-рӯз фурсат медиҳанд ва дар ҳолати иҷро накардан, ҷарима мекунанд.

Пулиси Душанбе рӯзи 27-уми феврал дар ин хусус иттилоъ дода, гуфт, низоми мазкур аз 5-уми марти соли ҷорӣ, фаъол мешавад.

Ин ниҳод гуфтааст, ки дар ҳолати набудани суғуртаи ҳатмӣ ва муоинаи техникии нақлиёт нахуст паёми огоҳӣ ирсол шуда, барои ҳалли камбудӣ 10 шабонарӯз муҳлат дода мешавад.

Дар сурати бартараф накардани камбудиҳо дар ин муддат, нисбати ронанда барои муоинаи ҳатмии техникӣ накардани воситаи нақлиёт 234-сомонӣ ва барои идораи мошин бе доштани суғуртаи ҳатмӣ, 78-сомонӣ ҷарима (моддаи 315, қисми 1 ва 2-и КҲМ) татбиқ мешавад.

Пулиси Душанбе аз ронандагон хостааст, то ҳуҷҷатҳои суғуртаи ҳатмӣ ва муоинаи техникии нақлиётро саривақт гиранд то ҷарима нашаванд.

Барои маълумоти бештар метавонед бо рақамҳои 39-39– дар хусуси низоми суғуртаи электронӣ ва 300-20-30-40 – дар бораи муоинаи техникии воситаҳои нақлиёт, тамос гиред. 

Тибқи қонун дар бораи ҳаракат дар роҳ, тамоми воситаҳои нақлиёт дар кишвар бояд аз муоинаи техникӣ гузаронида шаванд. Дар асоси он мошинҳое, ки аз муоинаи ҳатмии навбатии техникӣ нагузаштаанд, минбаъд барои истифода иҷозат дода намешавад.

 

То роҳандозии низоми ягона, нозирони БДА ронандаро огоҳ мекарданд, ӯро барои муоинаи техникии маҷбурӣ мефиристоданд, парванда тартиб медоданд, ба ӯ ҷарима менавиштанд ва рақамҳои давлатии бақайдгирии автомобилро мегирифтанд.

Дар Тоҷикистон аз 18-уми майи соли 2025 меъёрҳои андоз аз воситаҳои нақлиёт дар Тоҷикистон ба таври назаррас гарон шуданд.

Ҳангоми аз муоинаи ҳамасолаи ҳатмии техникӣ гузаштан андоз ситонида мешавад, ки ба иқтидори муҳаррики автомобил вобаста аст.

Масалан, барои автомашинаи тамғаи Mercedes-Benz C-класс бо ҳаҷми муҳаррики 1,8 литр ва иқтидори 156 қувваи асп, андоз тибқи меъёрҳои нав (9 сомонӣ барои ҳар як қувваи асп) 1 ҳазору 404 сомониро ташкил медиҳад.

Дар ин пайванд то чӣ андоза афзудани меъёрҳои андоз ва арзиши муоинаи техникиро аз рӯи иқтидори мошин бубинед.

Ҳамчунин ба муоинаи техникӣ хароҷоти ҳатмии зерин низ дохил мешаванд:  

МАТЕРИАЛЫ ПО ТЕМЕ
Муоинаи техникии нақлиёт дар Тоҷикистон гарон шуд. Чӣ қадар?

– Ташхис (диагностика)-и ҳолати техникӣ – 360 сомонӣ.

– Санҷиши таҷҳизооти газӣ (агар насб шуда бошад) – 85 сомонӣ.

– Таҳлили газҳои партобшуда – 60 сомонӣ.

– Полиси суғурта – тахминан 290 сомонӣ.

– Маълумотнома (справка) барои ронанда – 65 сомонӣ.

“Азия-Плюс” барои осонии кори ронандагон, ки барои тамғаи воситаи нақлиёташон бояд чӣ қадар андоз пардохт кунанд, ҳисобкунак (алкулятор)-и қулай таҳия кард.

Дар Тоҷикистон соли 2021-ум суғуртаи ҳатмии ҷавобгарии гражданию ҳуқуқии соҳибони воситаҳои нақлиёт роҳандозӣ гардид, ки  арзиши он дар ҳаҷми аз 2 то 3 нишондиҳанда барои ҳисобҳо, муқаррар шудааст.

Бояд гуфт, муоинаи техникӣ дар марказҳо ва устохонаҳои хидматрасонии ваколатдор, ки барои ин кор иҷозатнома доранд, гузаронида мешавад. Ин  марказу устохонаҳо бо таҷҳизоти махсус ва асбобҳои зарурӣ барои санҷиши дақиқи  воситаҳои нақлиёт мувофиқат ба меъёрҳои муқарраршуда, муҷаҳҳаз карда шудаанд. Баъди муоинаи техникӣ БДА ба соҳиби автомобил ҳуҷҷати тасдиқкунанда медиҳад.

Тибқи маълумоти БДА дар кишвар 62 нуқтаи санҷиши техникии воситаҳои нақлиёт амал мекунанд, ки 13 адади онҳо нуқтаҳои сайёр (ҳаракаткунанда) мебошанд. 

Дар Telegram, Facebook ва Instagram бо мо бимонед.

НАВШУДА: Трамп оғози “амалиёти размӣ”-и Амрико алайҳи Эронро тасдиқ кард

By
admin
-
0

Доналд Трамп, раисҷумҳури Амрико тасдиқ кард, ки кишвараш "амалиёти размии густурда алайҳи Эронро" оғоз кардааст. Ӯ ҳамагӣ чанд лаҳза баъд аз ҳамлаи Исроил ба чанд шаҳри Эрон аз оғози "амалиёти размӣ" хабар дод.

Доналд Трамп дар як муроҷиати видеоии худ, ки бештар аз 8 дақиқа идома мекунад, гуфт, ки "ҳадафи мо дифоъ аз мардуми Амрико аз тариқи аз байн бурдани таҳдидҳои қарибулвуқуъ аст”.

“Ҳадафи мо – маҳви таҳдидҳо аз сӯйи Эрон ва ҳимояи мардуми Амрико аст. Онҳо ба Иёлоти Муттаҳида, ҳамсоягони мо, пойгоҳҳои мо дар хориҷ ва муттаҳидони мо дар тамоми ҷаҳон таҳдид мекунанд”, – гуфт Трамп.

Дар ҳамин ҳол, “Ню-ЙоркТаймс” гузориш додааст, ки дар ҳамла ба Эрон ҳавопаймоҳои Амрико иштирок доранд. Ин расона навиштааст, ки ҳавопаймоҳои амрикоӣ, ки дар пойгоҳҳои Ховари Миёна ва новбарҳо ҷойгир шудаанд, ба Эрон зарба мезананд.

Ин паёми Трамп чанд лаҳза баъд аз хабари расонаҳо дар бораи ҳамлаи Исроил ба Эрон нашр шуд.

Ба гузориши хабаргузории “Ройтерз”, Вазорати дифои Исроил гуфтааст, ки ин кишвар чанд лаҳза пеш ҳамлаи пешгиронаи мушакие ба Эрон анҷом додааст.

Артиши Исроил эълон кардааст, ки дар саросари кишвар бонги хатарро ба садо даровардаст, то "мардумро барои эҳтимоли партоби мушакҳо ба Исроил омода созад".

Дар ҳамин ҳол, расонаҳои Эрон аз чанд таркиш дар Теҳрон гузориш додаанд. Хабаргузории “Форс” аз дасти кам се инфиҷор дар маркази Теҳрон хабар дода, навиштааст, ки гузоришҳои аввалия нишон медиҳанд, ки якчанд мушак ба хиёбони Донишгоҳва маҳудудаи Ҷумҳурӣ партофт шудааст.

Мақомоти Эрон то ҳол расман вокунише накардаанд. Ҳамин тар ҳоло паёмади ин таркишҳо маълум нест. Танҳо баъзе расонаҳои русӣ бо такя ба манобеи худ менависанд, ки "Эрон дар соатҳои наздик ба ин ҳамлаҳо посух мегӯяд".

Ҳоло Исроил фазояшро баста, ба посухи Эрон омода мешавад. Ироқ ҳам эълон кард, ки фазояшро бастааст.

Дар назди мактабҳои ноҳияи Рӯдакӣ зерсохтори бехатарӣ дар роҳ пайдо шуд

By
admin
-
0

Дар ноҳияи Рӯдакӣ лоиҳаи “Минтақаҳои бехатари мактабӣ” ба анҷом расид, ки барои беҳбуди сатҳи огаҳӣ ва таҷриба дар соҳаи бехатарии ҳаракат дар роҳ миёни хонандагон ва ҷавонон равона шудааст.

Лоиҳа дар се мактаби санҷишии ноҳияи Рӯдакӣ – №1, №15 ва №85 татбиқ шуд. Он аз ҷониби созмони ҷамъиятии “Насли навраси Тоҷикистон” бо мусоидати бевоситаи ҳукумати ноҳияи Рӯдакӣ, раёсати маорифи ноҳия, роҳбарони мактабҳо ва шуъбаи БДА дар ин ноҳия амалӣ шуд. Дар татбиқи лоиҳа FIA Foundation (Федератсияи байнулмилалии автомобилӣ) ва EASST (Эътилофи шарқ ба хотири нақлиёти бехатар ва устувор) кумак кардаву саҳм гузоштанд.

Ҳамагӣ дар доираи лоиҳа зиёда аз 700 хонандаи синфҳои 5-7-ум аз давраи омӯзишӣ гузаштанд. Дар ҳар кадоме аз мактабҳои зикршуда гурӯҳҳои Нозири навраси роҳҳо (ННР) таъсис дода шуданд. Хонандагоне, ки аз давраи омӯзишӣ гузаштанд, акнун худашон дар мактаб риояи қоидаҳои ҳаракат дар роҳ ва рафтори бехатар дар кӯчаву роҳҳоро тарғиб намуда, инчнуин дарсҳои кушод мегузаронанд. Барои баргузор намудани чунин дарсҳо ба нозирон дастурамалҳои махсуси таълимӣ ва аёнӣ оид ба бехатарии ҳаракат дар роҳҳо, ки аз ҷониби Вазорати маориф ва илми ҶТ тасдиқ карда шудааст, тақдим карда шуд. Ба ин маҷмӯа дастурамалҳо барои кӯдакони синни то 6-сола, 6-11-сола ва 12-14 сола дохил мешаванд. Ғайр аз ин, нозирони наврас бо либосҳои махсуси инъикосгари рангҳо, чӯбдасти танзимгарони ҳаракат ва сарпӯшҳо таъмин шуданд.

 

Ҳамчунин дар доираи лоиҳа дар назди мактабҳо қитъаҳои пиёдагард, аломатҳои “эҳтиёт кӯдакон” ва маҳдудкунандаи суръати ҳаракати автомобилҳо то 40 км/соат гузошта шуданд. Дар қад-қади роҳ бошад, панҷараҳои оҳанин гузошта шуда, болои ҷуйборҳоро пӯшониданд.

Тавре ки мудири лоиҳаҳои ТҶ “Насли навраси Тоҷикистон” Дилшод Холматов зикр кард, дар ин ташаббус бунёди асосу замина ҷиҳати пешбурди устувори бехатарии ҳаракат дар роҳ барои кӯдакон пешбинӣ шудааст. Ин тадбирҳо аз бевосита таъмин кардани мактабҳо бо захираҳои зарурӣ, ҷалби хонандагон, беҳбуди сатҳи огаҳӣ тариқи чорабиниҳои иттилоотӣ ва корзори гуногун иборат аст.

 

“Дар доираи лоиҳаи “Минтақаҳои бехатар назди мактабҳо” зерсохтори марбута барои бехатарии ҳаракат дар роҳ таъмин карда шуд. Барои пешгирии ҳодисаҳои нохуш бо иштироки кӯдакон минтақаҳои пиёдагард, инчунин аломатҳои “Кӯдакон” ва маҳдудияти суръати ҳаракат насб шуданд. Акнун ба туфайли кумаки ТҶ “Насли навраси Тоҷикистон” ва омӯзиши нозирони навраси роҳ, мо аз бехатарии кӯдакони худ ташвишу нигаронӣ надорем ва барои ин аз онҳо хеле миннатдорем”, – мегӯяд мудири мактаби №85-и ноҳияи Рӯдакӣ Мунавварова М.

Мудири мактаби №1 Абдураҳмонова М. ба ҷуз миннатдорӣ ба дастандаркорони лоиҳа барои кумак ва таълими хонандагон, инчунин ба ҳамкории пурсамари минбаъда изҳори умедворӣ кард. Ӯ миннатдории худро бахусус барои дастурамалу китобҳо, ки дар кори минбаъда оид ба таъмини бехатарӣ ва баланд бардоштани сатҳи дониши хонандагон дар ин самт хеле заруранд, изҳор намуд.

Дар Telegram, Facebook ва Instagram бо мо бимонед.

Амрикоиҳо тоҷикӣ меомӯзанд. Қиссаи тоҷике, ки дар Донишгоҳи Канзас дарси забони тоҷикӣ медиҳад

By
admin
-
0

Тадриси забони тоҷикӣ дар кишварҳои аврупоӣ ё Амрико кори ғайримаъмул нест. Дар баъзе донишгоҳҳои кишварҳои аврупоӣ мутахассисоне ҳастанд, ки барои хоҳишмандон забони тоҷикӣ дарс медиҳанд. Дар Амрикову баъзе кишварҳои осиёӣ ҳам нафароне ҳастанд, ки забони тоҷикӣ меомӯзанд ё дарс медиҳанд. Аммо нуктаи боиси зикр ин аст, ки дар аксар ин давлатҳо ва донишгоҳҳо забони тоҷикӣ чун забони форсӣ ва бо ҳуруфи ниёгон тадрис мешавад.

Замоне Бозор Собир, шоири шаҳири тоҷик ҳам гуфта буд, ки вақте дар Амрико дар ҳиҷрат буд, дар донишгоҳе ба донишҷӯён забони форсӣ бо ҳуруфи ниёкон дарс медод. Аз ин ҷост, ки вақте сафирони баъзе давлатҳо ба Тоҷикистон меоянд, бо форсӣ ва бо шеваи эронӣ суҳбат мекунанд.

Вале мо бо Бахтиёр Давлатмуродов, як зодаи Тоҷикистон суҳбат кардем, ки дар Донишгоҳи Канзаси ИМА (The University of  Kansas) забони тоҷикиро бо шеваи тоҷикистонӣ дарс медиҳад.

Ӯ ҳафтае 3 маротиба як соатӣ забони тоҷикиро аз рӯи китоби “Забони тоҷикӣ барои хориҷиён”-и муаллими шинохтаи забони тоҷикӣ Азим Байзоев ва маводи таълимии таҳиякардаи худ дарс медиҳад. Дарси таълимӣ дар барномаи донишгоҳӣ бо унвони Survival Tajik (Асосҳои забони тоҷикӣ барои муошират) ворид шудааст.

Бахтиёр Давлатмуродов қиссаи дар Амрико муаллими забони тоҷикӣ шуданашро ба “Азия Плюс” нақл кард.

 

Омӯзгори забони англисӣ, ки тоҷикӣ дарс медиҳад

Давлатмуродов аслан омӯзгори омӯзгорони забони англисӣ аст. Ӯ дар Тоҷикистон ба рӯзноманигорон забони англисӣ дарс додааст. Ин дарсҳо аз сӯйи Сафорати Амрико дар Душанбе ташкил шуда буд. Ӯ ҳамчунин, роҳбари минтақавии лоиҳаи “Забони англисӣ бидуни марз” дар пойтахт ва ноҳияҳои тобеи марказ буда, дар як қатор ташкилот фаъолият кардааст.

 

“Дар асл ман муаллими забони англисӣ ҳастам, аммо ба тадриси забони тоҷикӣ рағбати беандоза дорам. Дар омӯзиши забони тоҷикӣ кори ман танҳо бо луғат ва грамматика маҳдуд намешавад. Донишҷӯёнро бо фарҳангу санъат, расму ойин ва зиндагии тоҷикон низ ошно месозам”, – мегӯяд ӯ.

Ба гуфтаи Бахтиёр, ҳатто чанде аз донишҷӯёни Донишгоҳи Канзас мехоҳанд забони тоҷикиро то дараҷаи олӣ омӯзанд. Сабаби асосии таваҷҷуҳи онҳо таҳқиқоти илмӣ, кор дар минтақаи Осиёи Марказӣ, дипломатия ё фаъолияти ризокорӣ будааст.

Ӯ мегӯяд, яке аз шогирдони амрикоиаш бо номи Ҷон ба хотире, ки тарзи қироати шеъри тоҷикӣ барояш писанд аст, ба омӯзиши забони тоҷикӣ пардохтааст.

“Ҷон хеле зуд тоҷикиро меомӯзад. Шогирди дигарам Майло низ, ки шаҳрванди Амрико аст, аз сабаби завқ ба фарҳанги тоҷикон, забони тоҷикӣ меомӯзад. Майло инчунин нақшаи сафар ба Тоҷикистон дорад”, – мегӯяд Бахтиёр.

 

Фарҳанги нуҳуфта

Бахтиёр мегӯяд, чун дар Амрико фанҳои таълимиро худи донишҷӯён интихоб мекунанд, ҳатто баъзе забонҳои ба барномаи таълимӣ воридшуда, аз ҷониби касе интихоб намешавад. Аммо дар Донишгоҳи Канзас дӯстдорони забони тоҷикӣ таҳсил мекунанд. Зеро ҳар рӯзи панҷшанбе Бахтиёр бо иштироки 15-20 нафар донишҷӯ ба таври ҳузурӣ, дарси кушод дар бораи фарҳанги тоҷикон мегузаронад.

“Рӯзе яке аз мавзӯҳои дарсӣ Фалак буд. Фалак бештар хоси фарҳанги мардуми минтақаи Хатлон аст. Барои донишҷӯён то тавонистам фалаксароӣ кардам, ки барояшон ҷолиб буд”, – таъкид ӯ.

Ӯ гуфт, ки вақти таҷлили рӯзи байналмилалии забонҳо иштирокчиёнро бо лафзи тоҷикӣ – “салом”, “раҳмат”, “номи шумо чист”, “забони тоҷикиро медонед?” ва мисли ин, ошно кардааст.

Инчунин, дар чорабинии “Фарҳанги нуҳуфта” (Hidden Culture) рақси бадахшӣ карда, маънои ҳаракатҳоро фаҳмонидааст.

“Баъд ба иштирокчиён гуфтам, як рақси дигар мекунам то ҳаракатҳоямро такрор кунанд. Зиёда аз сад нафар зери навои суруди бадахшӣ рақс карданд”, – зикр кард ӯ.

 

Бахтиёр нақша дорад, ки ба навбат фарҳангу одатҳои ҳар минтақаи Тоҷикистонро ба донишҷӯёнаш ва хоҳишмандони дигар нишон диҳад.

Ӯ мегӯяд, асосан меҳмоннавозии тоҷикон, мусиқӣ, тарзи қироати шеър ва ҷашни Наврӯз диққати хориҷиёнро ҷалб кардааст. Ин таваҷҷуҳро Бахтиёр имконияти таблиғи забону фарҳанг медонад.

“Бо бештар шудани таваҷҷуҳ ба Осиёи Марказӣ, омӯзиши забони тоҷикӣ рушд хоҳад кард, агар барномаҳои грантӣ, омӯзгорони соҳибтаҷриба ва маводи босифат бештар шавад”, – таъкид кард ӯ.

Ба қавли Бахтиёр, забони тоҷикӣ дар Донишгоҳи Канзас дар доираи барномаи Fulbright FLTA (Ёвари омӯзгори забони хориҷӣ) омӯзонда мешавад. Ин барнома одатан як соли академӣ давом ёфта, мақсади асосии он таблиғи забону фарҳанги камомӯзишшуда, рушди малакаи касбии омӯзгори хориҷӣ ва баъди бозгашт қисмат намудани таҷриба бо муаллимони ватанӣ мебошад.

 

Бахтиёр кист?

Бахтиёр мегӯяд, қаблан ба кормандони Сафорати Ҳиндустон дар Тоҷикистон ва чанде аз хориҷиёни хоҳишманд аз забони тоҷикӣ таълим додааст. Таҷрибаҳои ӯ сабаб шудааст, ки дар барномаи Fulbright FLTA пирӯз ва ҳамчун иштирокчии барнома сафири фарҳанги Тоҷикистон интихоб шавад. Вазифаҳои ӯ ҳамчун сафир таълими забони тоҷикӣ, муаррифӣ ва ташкили чорабиниҳои фарҳангӣ мебошад.

 

Бахтиёр худ дар оилаи коргар ба воя расидааст. Аммо ба омӯзиши забонҳо, аз ҷумла забони тоҷикӣ завқу шавқи беандоза доштааст. Ӯ гуфт, аз кӯдакӣ дар олимпиадаҳои фанни забони тоҷикӣ иштирок карда, ғолиб омадааст.

“Аз методика ва грамматикаи забони тоҷикӣ хуб огоҳам. Ҳатто хоҳаркалонам, ки худ забоншинос аст, аз ман хоҳиш мекард, ки барои навиштани матни аз ҷиҳати грамматикӣ бехато барояш кумак кунам”, – мегӯяд қаҳрамони мо.

Бахтиёр нақша дорад, ки моҳи марти соли ҷорӣ рӯзи фарҳанги Тоҷикистонро дар сатҳи донишгоҳ ташкил кунад. Бо ин мақсад аз ҳоло омодагиро оғоз кардааст.

Баъд аз анҷоми барнома ва бозгашт ба Тоҷикистону қисмати таҷриба бо омӯзгорони ватанӣ, ӯ мехоҳад боз ба Амрико баргардад ва таҳсилашро дар зинаи докторантураи PhD -и Донишгоҳи Канзас идома диҳад.

Дар Telegram, Facebook ва Instagram бо мо бимонед.

Афзоиши пешниҳоди қарз ба аҳолӣ аз сӯйи бонкҳои Тоҷикистон

By
admin
-
0

Соли 2025 аз ҷониби ташкилотҳои молиявии қарзии Тоҷикистон ба маблағи 30,0 млрд сомонӣ (ҳудуди 3 млрд доллар) қарз дода шудааст. Дар ин бора Бонки миллии Тоҷикистон (БМТ) хабар медиҳад.

Дар иттилои Бонки миллӣ зикр мешавад, ки ин нишондиҳанда ба андозаи 21,1% зиёдтар дар муқоиса бо соли 2024 аст.

Аз ҳаҷми умуми қарзҳои додашуда 42,6%-аш ба соҳаи истеъмол рост меояд. Қисмати боқимонда тариқи зайл аст:

– савдо ва хӯроки умумӣ – 13,4%;

– бахши кишоварзӣ – 11,8%;

– соҳаи саноат – 8,3%;

– соҳаи хидматрасонӣ – 7,1%;

– ипотека – 6,1%;

– сохтмон –  4,5%;

–  дигар соҳаҳо – 6,2% .

То охири соли 2025 бақияи умумии сандуқи қарзии ташкилотҳои молиявӣ 26,1 млрд сомониро ташкил додааст, ки ба андозаи 22,2% зиёдтар нисбат ба охири соли 2024 аст.

Меъёри миёнавазни фоизӣ дар соли 2025 бо асъори миллӣ 22,6% ва асъори хориҷӣ – 11,7%-ро ташкил медиҳад.

Меъёр бо асъори хориҷӣ дар муқоиса бо соли пешин бетағйир боқӣ монда, меъёр бо асъори миллӣ ба андозаи 0,5 банди фоизӣ боло рафтааст. Дар соли 2024 он ба 22,1% баробар буд.

МАТЕРИАЛЫ ПО ТЕМЕ
Эмомалӣ Раҳмон супориш дод, ки меъёри фоизи қарзҳои бонкӣ кам карда шавад. Онҳо бояд чӣ гуна бошанд?

Ёдрас мекунем, ки президенти кишвар Эмомалӣ Раҳмон дар паёми худ ба парлумон охири соли 2024 ба сохторҳои дахлдор супориш дод, ки барои паст кардани меъёрҳои фоизӣ аз рӯйи қарзҳо тадбирҳо рӯйи даст гиранд.

То ин вақт, ҳанӯз моҳи майи соли 2018 ӯ дастур дода буд, ки арзиши воқеии онҳо муайян карда шуда, давра ба давра меъёрҳои фоизии онҳо коҳиш дода шавад.

Дастрасӣ надоштан ба маблағгузорӣ бо шартҳои мусоид монеъаи асосӣ барои рушди тиҷорат маҳсуб меёбад.

Соҳибкорон бисёр вақт бо норасии маблағҳо барои гардиш дучор гардида, маҷбур мешаванд, ки ба бонкҳо муроҷиат кунанд. Аммо меъёрҳои баланд ва душвориҳои марбут ба баргардонидани маблағ ба он оварда мерасонанд, ки онҳо бо умеди барори кор қарз гирифта, лекин на ҳамеша ҷиҳати саривақт баргардонидани он фурсат меёбанд.

Ғайр аз ин, бисёре аз бонкҳо ба давраи кӯтоҳмуҳлат қарз пешниҳод мекунанд, вале барои соҳибкорон қарзҳои дарозмуҳлат лозиманд.

Дар Telegram, Facebook ва Instagram бо мо бимонед.

Субҳ ба хайр, Тоҷикистон! Як рӯз дар таърих, зодрӯзи шахсиятҳо, вазъи ҳаво барои 28 феврали ноябри соли 2026

By
admin
-
0

ЯК РӮЗИ ТАЪРИХ

Соли 1992 – Нашрияи “Нидои ранҷбар”-и Ҳизби коммунистии Тоҷикистон таъсис ёфт.

Соли 1992 – Муносибатҳои дипломатӣ миёни Тоҷикистон ва Олмон барқарор шуд.

Соли 2011 – Рустами Эмомалӣ сардори яке аз раёсатҳои Хадамоти гумруки назди Ҳукумати Ҷумҳурии Тоҷикистон таъйин шуд. Ҳоло Рустами Эмомалӣ шаҳрдори Душанбе аст.

Соли 2011 – Мирзохӯҷа Аҳмадов, аз фармондеҳони пешини Иттиҳоди мухолифини тоҷик ва ҷонибдоронаш силоҳҳои худро ба давлат супориданд.

Соли 2013 – Маҷлиси миллӣ Қонун “Дар бораи матбуоти даврӣ ва дигар ВАО”-ро тасдиқ кард.

Соли 2020 – Парлумони Тоҷикистон Созишнома оид ба сохтмони роҳи автомобилгарди атрофи НБО "Роғун"-ро ба маблағи тақрибан 400 миллион доллар тасдиқ кард.

Соли 2020 – Мақомоти Арабистони Саудӣ муваққатан ворид шудани шаҳрвандон, аз ҷумла шаҳрвандони Тоҷикистонро барои анҷоми умра бинобар пандемияи коронавирус манъ карданд.

 

ШАХСИЯТҲО

Соли 1936 – Мавлуди Акбар Ҷӯраев, яке аз поягузорони телевизиони тоҷик ва раиси пешини Кумитаи радио ва телевизиони Тоҷикистон.

Акбар Ҷӯраев аз арбобони фарҳанги Тоҷикистон ба шумор мерафт ва аз нахустин нафароне буд, ки тугмаи оғози барномаҳои телевизиони Тоҷикистонро ҳамчун коргардони ҷавон дар соли 1959 пахш кард. Ӯ кӯдакиашро дар ноҳияи Кангурти вилояти Хатлон гузаронд.

Охири солҳои 80-ум ва авоили солҳои 90-ум чанд мудат раиси Кумитаи радио ва телевизиони Тоҷикистон ва муовини вазири фарҳанги Тоҷикистон буд. Як муддат муовини раиси Кумитаи радио ва телевизиони Тоҷикистон низ буд.

Акбар Ҷӯраев 30-юми декабри соли 2015 дар синни 80-солагӣ аз олам даргузашт.

Соли 1948 – Зодрӯзи Ҳалима Эркаева, раққоса, Ҳунарпешаи шоистаи Тоҷикистони Шӯравӣ.

Ҳалима Эркаева яке аз ҳунарпешагони хизматнишондадаи тоҷик буда, дар ҳайати дастаҳои ҳунарӣ навъҳои гуногуни рақс, аз ҷумла “Офтоб”, “Сайри гул”, “Гулбозӣ”, “Танаввор”, “Муноҷот”, “Ҷавонӣ”, “Дӯстӣ”-ро иҷро кардааст.

Ӯ баробари рақси тоҷикӣ арғушти рақси дигар халқҳо, аз ҷумла ҳиндӣ, арабӣ, туркӣ, узбекӣ, озарӣ, русиро бо маҳорати баланд иҷро намудааст. Аз соли 1987 роҳбари бадеии ансамбли рақсии “Фирӯза”-и Қасри иттифоқҳои касабаи Душанбе буд ва рақсҳои “Лайло”, “Дилбарҷон”, “Духтари Фархор”, “Ширин”, “Хатлон”, “Гулҳои Мастчоҳ”, сюитаҳои рақсии “Эй дилбари ман”, “Гулҳои Тоҷикистон”, “Ту ҷонони манӣ”-ро рӯи саҳна овардааст.

Соли 1951 – Мавлуди Умар Зиёев, овозхони эстрадаи тоҷик, Ҳунарпешаи халқии Тоҷикистон.

Умар Зиёев Институти политехникии Тоҷикистонро хатм кардааст. Ӯ соли 1974 ба дастаи эстрадии “Гулшан” даъват гардид ва беш аз ду даҳсола дар пешбурди эстрадаи тоҷик саҳм гирифт. Мавсуф аз сарояндаҳои хушноми 50 соли охир буда, солҳо раҳбарии дастаҳои ҳунарии “Гулшан” ва “Сипар”-ро ба дӯш дошт.

Ин овозхон солҳои 1980-ум бо сурудаҳои “Сад раҳ дар интизорат”, “Зулфи парешон” ва “Замини маҳбуб ва зодгоҳ” шӯҳрат ёфта, солҳои 2000-ум ба хондани сурудҳои ватанпарварона пардохт.

Дар охирин мусоҳибааш бо “Азия-Плюс” гуфта буд, бо сари баланд масъулияти ба дӯш доштаро ба поён расонид.

Овозхон 18-уми марти соли 2024 дар синни 73-солагӣ аз олам даргузашт. Ӯ дар охири умр ният дошт, ки таърихи дастаи ҳунарии "Гулшан"-ро нависад.

Соли 1954 – Мавлуди Асадулло Ғуломов, ходими давлатӣ, собиқ ноиби аввали сарвазири Тоҷикистон.

Асадулло Ғуломов, собиқ муовини аввали сарвазири Тоҷикистон яке аз шахсиятҳои намоёни кишвар буда, дар  пешрафти кишвар талоши зиёд кардааст. Махсусан дар сохтмони иншооти муҳими кишвар, чун нерўгоҳҳои барқи обӣ, корхонаҳои истеҳсолӣ, сохтмону барқароркунии роҳҳо саҳм доштааст.

Солҳои 1995-2001 муовини аввали раиси Ширкати давлатии сохтмонии “Тоҷиксохтмон” ва солҳои 2000-2003 ба сифати раиси ноҳияи Фрунзе (Сино)-и шаҳри Душанбе фаъолият намудааст.

Соли 2003-2006 муовини сарвазири Тоҷикистон буд ва аз 1 декабри соли 2006 муовини аввали сарвазири Тоҷикистон таъйин гардид.  

Асадулло Ғуломов 3-юми августи соли 2011 дар синни 57-солагӣ нобаҳангом аз олам чашм пўшид.

Соли 1954 – Зодрӯзи Мақсуди Ҳусайн, рӯзноманигор ва адиби тоҷик.

Соли 1958 – Мавлуди Олимхон Исматӣ, рӯзноманигор ва шоири тоҷик.

Соли 1959- Зодрӯзи генерал-лейтенанти милитсия Рустам Назарзода, раиси собиқи Кумитаи ҳолатҳои фавқулода ва мудофиаи граждании Тоҷикистон (КҲФ)

Аз соли 1980 то 1985 ҳамчун ваколатдори оперативӣ, ваколатдори калони оперативӣ ва сардори шуъбаи Раёсати кофтукови ҷиноятии Вазорати корҳои дохилии Тоҷикистон фаъолият кардааст. Аз соли 1985 то 1992 ҳамчун муовин ва баъдан сардори Шӯъбаи корҳои дохилии шаҳри Турсунзода кор кардааст.

Аз соли 1990 то 1995 вакили мардумии Шӯрои Олии Ҷумҳурии Тоҷикистон интихоб шудааст. Аз соли 1992 то 1995 сардори Раёсати кофтукови ҷиноятии ВКД, аз соли 1995 то 1996 муовини вазири корҳои дохилии Тоҷикистон буд.

Аз соли 1996 то 1999 раиси Комиссияи давлатии Тоҷикистон оид ба назорати маводи мухаддир кор кардааст.

Соли 1999 бо фармони президенти  Тоҷикистон директори Агентии назорати маводи нашъаовар таъин шудааст.

Аз 30 январи то 9 августи соли 2004 ҳамчун муовини аввали Директори АНМ ва аз 9 августи соли 2004 дубора директори Агентӣ таъин гардида, то 2 феврали соли 2016 дар ин вазифа фаъолият кардааст. 

Аз 2-юми феврали соли 2016 то моҳи январи соли 2025 раиси КҲФ буд.

Ҳоло бознишаста аст.

 

САНАҲОИ МУҲИМИ ҶАҲОНӢ

28 феврали соли 1935 химики амрикоӣ Уоллес Каротерс нейлонро кашф кард. Ӯ нахуст смолаи полиамидӣ ихтироъ намуда, нахҳои нави синтетикиро ба вуҷуд овард.

Аввалин нейлонҳо соли 1939 ба фурӯш баромаданд ва нахустин ҷӯробҳои нейлонӣ дар Амрико боиси таваҷҷуҳи ҷомеа гардиданд.

Имрӯз Рӯзи хоб дар ҷойҳои ҷамъиятӣ таҷлил мешавад. Тибқи ин анъана, хоби кӯтоҳ дар ҷойҳои ҷамъиятӣ нишонаи заҳматкашӣ ва серкорӣ мебошад. Ҳадафи ин рӯз ҷалби таваҷҷуҳи ҷомеа ба аҳамияти хоб дар ҳаёти инсон гуфта мешавад.

Имрӯз яке аз ҷашнҳои миллӣ ва дӯстдоштаи финҳо – Рӯзи эпоси миллӣ “Калевала” таҷлил мегардад. Ин ҷашн ба эпоси мардумии карело-финӣ ва фарҳанги Финландия бахшида шудааст ва рӯзи барафроштани парчами миллӣ дар ин кишвар ба ҳисоб меравад.

 

ВАЗЪИ ҲАВО*

Дар вилояти Суғд – Ҳавои тағйирёбандаи бебориш пешгӯӣ мешавад. Ҳарорат: дар водиҳо рӯзона 9+14º гарм, дар ноҳияҳои кӯҳӣ рӯзона 2+7º гарм, дар баъзе ноҳияҳо то 10+12º гарм, дар водиҳо шабона 2+7º гарм, дар ноҳияҳои кӯҳӣ шабона 2-7º сард.

Дар вилояти Хатлон – Ҳавои тағйирёбандаи бебориш пешгӯӣ мешавад. Ҳарорат: дар водиҳо рӯзона 20+25º гарм, дар доманакӯҳҳо рӯзона 10+15º гарм, дар водиҳо шабона 6+11º гарм, дар ноҳияҳои доманакӯҳӣ шабона 2+7º гарм.

Дар шаҳру ноҳияҳои тобеи ҷумҳурӣ – Ҳавои тағйирёбандаи бебориш пешгӯӣ мешавад. Ҳарорат: дар водиҳо рӯзона 17+22º гарм, дар ноҳияҳои кӯҳӣ рӯзона 5+10º гарм, дар водиҳо шабона 4+9º гарм, дар ноҳияҳои кӯҳӣ шабона 5-10º сард, дар баъзе ноҳияҳо то 0+2º гарм.

Дар Вилояти Мухтори Кӯҳистони Бадахшон – Ҳавои тағйирёбандаи бебориш пешгӯӣ мешавад. Ҳарорат: дар ғарби вилоят рӯзона 5+10º гарм, дар баъзе ноҳияҳо то 12+14º гарм, дар шарқи вилоят рӯзона -2+3º, дар ғарби вилоят шабона -3+2º,  дар баъзе ноҳияҳо то 4+6º гарм, дар баъзе ноҳияҳо то 12+14º гарм, дар шарқи вилоят шабона 6-11º сард, дар баъзе минтақаҳо то 15-17º сард.

Дар шаҳри Душанбе – Ҳавои тағйирёбандаи бебориш пешгӯӣ мешавад. Ҳарорат: рӯзона 20+22º гарм, шабона 4+6º гарм.

Дар шаҳри Хуҷанд – Ҳавои тағйирёбандаи бебориш пешгӯӣ мешавад. Ҳарорат: рӯзона 11+13º гарм, шабона 2+4º гарм.

Дар шаҳри Бохтар – Ҳавои тағйирёбандаи бебориш пешгӯӣ мешавад. Ҳарорат: рӯзона 21+23º гарм, шабона 7+9º гарм.

Дар шаҳри Хоруғ – Ҳавои тағйирёбандаи бебориш пешгӯӣ мешавад. Ҳарорат: рӯзона 8+10º гарм, шабона 1-3º сард.

*Ҳарорати шабонаи ҳаво шаби 28-уми феврал ба 1-уми март ба ҳисоб гирифта шудааст.

Дар Telegram, Facebook ва Instagram бо мо бимонед.

1...464748...50,000Page 47 of 50,000