Душанбе. 15-уми июл. ОИ «Азия-Плюс» – Дар Агентии назорати маводи нашъаовари назди президенти ҶТ мулоқоти директори агентӣ Рустам Назаров бо ҳайати Иттиҳоди Аврупо (ИА) таҳти сарварии намояндаи махсуси ИА оид ба масоили Осиёи Марказӣ Пйер Морел доир гардид.

Аз дафтари матбуоти агентӣ ба ОИ «Азия-Плюс» хабар доданд, ки П.Морел ба директори агентӣ оид ба фаъолияти ИА дар мавриди таҳкими марзҳо ва мубориза алайҳи муомилоти ғайриқонунии маводи мухаддир дар кишварҳои минтақа маълумот додааст.

«Зимни суханронӣ бобати нақшаҳои наздики ИА дар минтақа, ӯ зикр кард, ки иттиҳод масоили таъмини амният дар минтақа ва мубориза алайҳи қочоқи маводи мухаддирро аз масъалаҳои умда медонад, – идома дод манбаъ. –


Иттиходи Аврупо дар ҳамкорӣ бо Барномаи мубориза бо маводи мухаддири СММ ва Созмони амният ва ҳамкории Аврупо дар шаҳри Душанбе ахири моҳи октябри соли ҷорӣ вохӯрии вазирони корҳои хориҷии кишварҳои минтақаи Осиёи Марказӣ ва намояндагони давлатҳои ИМА, Русия ва Чинро созмон хоҳад дод».

Ба иттилои сарчашма, дар вохӯри намояндагони Финландия чун кишвари раисикунанда дар иттиҳод низ ширкат хоҳанд варзид.

«Дар мулоқот масоили таҳкими назорати марзҳо, мубориза бар зидди қочоқи маводи мухаддир ва таҳияи стратегияи ҳамкорӣ дар ин самт мавриди баррасӣ қарор хоҳанд гирифт».

Тибқи иттилои намояндаи агентӣ, директори он меҳмононро бо вазъи мубориза алайҳи қочоқи маводи мухаддир дар минтақа, фаъолияти мақомоти салоҳиятдори ҳифзи ҳуқуқ дар ин самт ошно сохт. Ӯ сатҳи ҳамкории Иттиҳоди Аврупо ва Тоҷикисонро дар мубориза алаҳи муомилоти ғайриқонунии маводи мухаддир қаноатбахш арзёбӣ намуд.

«Генерал Р.Назаров баргузории вохӯриҳои қарибулвуқӯъро муҳим дониста, пешниҳод кард, ки дар форуми моҳи октябр масъалаи ҳамоҳангсозии фаъолияти созмонҳои байнулмилалӣ ҷиҳати татбиқи лоиҳаҳову барномаҳои мавҷуда муҳокима гардад», – афзуд манбаъ.

Душанбе. 15-уми июл. ОИ «Азия-Плюс» – Имрӯз дар Кумитаи иҷроияи Иттиҳоди Давлатҳои Мустақил (ИДМ) машварати дурӯзаи гурӯҳи коршиносон оид ба мувофиқа кардани тартиби эътирофи санадҳои омодасозии ҳайати корӣ дар соҳаи таъмини бехатарӣ дар саноат, санҷиш ва гувоҳнома додан ба кормандон оғоз мегардад.

Мушовири дафтари матбуоти Кумитаи иҷроияи ИДМ Мария Гутсало изҳор дошт, ки лоиҳаи Созишномаро Кумитаи давлатии Украина оид ба таъмини бехатарӣ дар саноат, ҳифзи меҳнат ва назорати корҳо дар соҳаи саноати кӯҳкорӣ таҳия намудааст ва он дар ҷаласаи шӯрои байнидавлатӣ оид ба таъмини бехатарӣ дар соҳаи саноат моҳи августи соли 2007 маъқул дониста шудааст.

Ба гуфтаи ӯ, дар санад риояи меъёрҳои мувофиқашудаи таъмини бехатарии кор дар саноат аз ҷониби кишварҳои узви ИДМ пешбинӣ шудаанд.

«Ҷонибҳо ӯхдадор мешаванд, ки санадҳои ҳамдигарро, ки аз тарафи мақомоти ваолатдори кишварҳо дода шудааст, эътироф намоянд, – идома дод М.Гутсало. – Дар ҳамин ҳол, кишварҳо дар тасвиби санадҳои ғайриқонунӣ

 

низ масъул мебошанд».

Пас аз мувофиқасозии ниҳоӣ лоиҳа ба баррасии ҷаласаи сарони кишварҳои узви ИДМ пешниҳод мегардад.

Душанбе. 14 -уми июл. ОИ «Азия-Плюс» – Яке аз сохторҳои Бонки рушди Осиё эълом доштааст, ки дар чаҳорчӯбаи лоиҳаи «Осиёи дар ҳоли рушд қарордошта» барои рӯзноманигорон ва нашрияҳое, ки ба тамоюли рушд ва нуфузи минтақаи Уқёнуси Ором сарукор доранд, озмуни тоза эълон намояд.

Аз дафтари намояндагии бонк дар Тоҷикистон хабар доданд, ки ҳайати ҳакамон 25 мақолаҳои беҳтаринро интихоб хоҳанд намуд, ки дар тӯли солҳои 2007-2008 нашр шудаанд.

Муаллифони мақолаҳо моҳи ноябри соли 2008 ба семинари чаҳоррӯза ба Токио даъват карда хоҳанд шуд, ки ба онҳо аз рӯи

 

мавзӯъҳои «ҳамгиройии минтақавӣ», «зерсохтор» ва «ҳифзи муҳити зист» ҷоизаҳо супорида мешаванд.

 

Хуҷанд. 14-уми июл. ОИ «Азия-Плюс» – Имрӯз Ҷамъияти саҳомии шакли кушоди (ҶСШК) комбинати маъдантозакунии «Адрасмон» аз нав ба фаъолият оғоз мекунад.

Раиси раёсати тозатаъиншудаи Ҷамъияти саҳомии «Конимансур» Нурлан Алимбетов изҳор дошт, ки дар шаҳри Алмаато мурофиаи додгоҳии ширкати «Казинвест-Минерал» ва ширкати қазоқии «Норд Тайм» ба анҷом расидааст. Ба ширкати «Казинвест-Минерал» 100 дарсад саҳмияҳои ҶСШК Комбинати маъдантозакунии «Адрасмон» тааллуқ доранд ва ширкати «Норд Тайм» ҷиҳати роҳандозии фаъолияти комбинат 20 миллион доллари амрикоӣ сармоягузорӣ намудааст.

Зимни мувофиқаи бадастомада, 74 дарсади саҳмияҳои ҶС «Конимансур» ба ихтиёри ширкати «Норд тайм» вогузор шудаанд, ки ин шароит фароҳам овардааст, фаъолияти корхонаро аз нав ба роҳ монанд.

                   «Ширкати «Норд тайм» маҷбур шуд, ҷиҳати дифоъи ҳуқуқҳои худ ва маблағҳои сармоягузориаш ва ҳамчунин махфӣ нигоҳ доштани вазъи ҳақиқӣ ва идора дар корхонаи маъдантозакунӣ аз болои ширкати «Казинвест-Минерал» ба додгоҳ муроҷиат намояд. – идома дод Н.Алимбетов. –

Айни замон корхона маблағҳои нахустинро ҷиҳати пардохти андоз ва музди меҳнат гирифт».

Душанбе. 14-уми июл. ОИ «Азия-Плюс» – Аз сафорати Ӯзбекистон дар Тоҷикистон хабар доданд, ки дар шаҳри Когони вилояти Бухорои Ӯзбекистон мардум ба хонаҳояшон бармегарданд ва умуман дар вилоят зиндагӣ ба маҷрои пешин – орму босубот ҷараён дорад.

Таври маълум, санаи 10-уми июли соли равон дар анбори аслиҳаву муҳимоти шаҳри Когон инфиҷор рух дод ва аҳолии наздики анбор ба ҷои бехавф кӯчонида шуданд.

Бино ба иттилои манбаъ, ҷиҳати рафъи оқибатҳои инфиҷору сӯхтор хизматчиёни ҳарбии вазорати мудофиа ва ниҳодҳои вазорати ҳолатҳои фавқулодда ва мудофиаи граждании ҷумҳурӣ ҷалб карда шудаанд.

«Мувофиқи маълумот, бар асари инфиҷор 3 нафар ҳалок гашта, 21 нафари дигар ҷароҳатҳо бардоштаанд ва айни замон ба онҳо кӯмаки тиббӣ расонида мешавад», – изҳор дошт манбаъ.

Дар ҷои ҳодиса комиссияи ҳукуматӣ иборат аз намояндагони ниҳодҳои қудратии кишвар кор мекунад.

«Тибқи маълумоти Маркази идораи ҳолатҳои фавқулоддаи Ҷумҳурии Ӯзбекистон дар вилоят ҳамаи корхонаву ташкилот бомаром фаъолият намуда, вазъ ба мкҷрои пешини орому босубот бармегардад», – афзуд сарчашма.