Душанбе. 26-уми июни с.2008. ОИ «Азия-Плюс»



– Дар Тоҷикистон афзоиши босуръати қисми хароҷоти буҷаи давлатӣ ба мушоҳида расидааст.

Аввали ҳафта он дар муаррифии «Хулосаҳои шарҳи барномавии хароҷоти давлатӣ дар соли 2008», ки намояндагии Бонки ҷаҳонӣ (БҶ) дар ҶТ доир кардааст, баён гардид.

Мувофиқи маълумоти тадқиқоти намояндагии БҶ дар ҶТ, хароҷоти давлатӣ ва воситаҳои ғайрибуҷавӣ дар соли 2006 27% ва дар соли 2007 30% афзудаанд.

«Тибқи нақшаи тасдиқшудаи буҷаи давлатӣ дар соли 2008 ҳаҷми афзоиши муқаррарии хароҷоти давлатӣ 41%-ро ташкил медиҳад», – пешгӯӣ мекунанд коршиносони БҶ.

Дар ҳамин ҳол, музди меҳнат нобаробар ва бидуни гузаронидани ислоҳот дар соҳаҳои дахлдор афзоиш меёбад. Ҳамчунин хароҷотҳои асосӣ, ки барои қарздиҳӣ, сармоягузорӣ ва таъмини кафолатнокии лоиҳаҳои сармоягузорӣ истифода мешаванд, низ дар ҳоли афзоиш қарор доранд. Аз соли 2004 то соли 2007 афзоиши онҳо аз 8,1% ба 14,1% расидааст.

Хароҷоти ҷорӣ (пардохти музди меҳнат, хароҷотҳои таъмири бино, иншоот ва ғайра) ҳамагӣ аз 12,1% ба 13,4% боло рафтааст.

Тибқи пешгӯии БҶ, буҷаи давлатии Тоҷикистон аз ҳисоби маблағҳои дохилӣ афзоиш хоҳад ёфт. Андозаи маблағҳои зарурӣ ба 0,8%-и маҷмӯи маҳсулоти дохилӣ (ММД) баробар аст. Дар навбати худ, он ба афзоиши маҷмӯи хароҷот мусоидат намуда, зиёд шудани миқдори пул дар кишварро бозмедорад. Ёдрас мекунем, ки


соли гузашта ҳаҷми маҷмӯи маҳсулоти дохилӣ 12 млрд. 768 миллион сомониро ташкил додааст ва он нисбат ба соли 2006 7,8% афзудааст. Дар соли равон маҷмӯи маҳсулоти дохилӣ дар ҳаҷми 16 млрд. 380 млн. сомонӣ пешбинӣ шудааст, ки он нисбат ба соли гузашта 8% бештар аст.

Хуҷанд. 26-уми июни с.2008. ОИ «Азия-Плюс»



– Чанде қабл дар шаҳри Исфара маросими ба истифода додани корхонаҳои истеҳсоли семент ва коркарди мева доир гардид.

Раиси шаҳри Исфара Муҳиба Ёқубова хабар дод, ки иқтидори корхона ба истеҳсоли 70 ҳазор тонна семент дар як сол баробар аст «Дар корхона 80 нафар бо ҷои кор таъмин гардида, мувофиқи маълумоти пешакӣ, музди меҳнати моҳонаи онҳо 700 сомониро ташкил медиҳад», – идома дод ӯ.

Корхонаи дуввум оид ба коркарди мева дар таркиби Чамъияти саҳомии «Нони Исфара» сохта шуда, дар он ду хат насб гардидааст. Як хат барои ҷудокунӣ ва бандубасти меваи хушк в хати дигар ҷиҳати коркарди мева ва истеҳсоли маҳсулоти ғизоӣ, аз ҷумла ширӣ пешбинӣ гардидааст. Ба гуфтаи раиси шаҳр, дар корхона 30 нафар машғули кори домӣ гардида, иқтидори он истеҳсоли 15 тонна маҳсулот дар як рӯзро ташкил хоҳад дод. Корхона бо сармоягузории кишвари Канада ва Тоҷикистон, ки ба 156 ҳазор доллари амрикоӣ баробар аст, бунёд ёфтааст. «Нисфи маблағро созмони байнулмилалии «


MEDA


» ва қисми дигарро ширкати «Таджфрукт» (Меваи Тоҷикистон) сармоягузорӣ карданд», – изҳор дошт М.Ёқубова.

Дар маросими ба истифода додани корхонаҳо раиси вилояти Суғд Қоҳир Расулзода, ки бо сафари корӣ дар шаҳри Исфара қарор дорад, иштирок кард.

Душанбе. 26-уми июни 2008с. ОИ «Азия-Плюс»



– Дирӯз дар Кумитаи ҷавонон, варзиш ва сайёҳии нази Ҳукумати ҶТ вохӯрии мақомоти роҳбарии кумита бо сафири Фавқулодда ва Мухтори Ҷумҳурии Ӯзбекистон (ҶӮ) дар ҶТ Шоқосим Шоисломов барпо гашт.

Аз сафорати ҶӮ дар Тоҷикистон хабар доданд, ки зимни сӯҳбат сафир бобати бароҳандозии сиёсати ҷавонон дар кишвараш маълумот дод. «Соли ҷорӣ бо фармони сарвари давлат Ислом Каримов дар Ӯзбекистон «Соли ҷавонон» эълон шудааст ва ҳукумати кишвар барои ҳалли масоили маориф, истироҳат ва бо ҷои корӣ ва манзили зист таъмин намудани ҷавонон тамоми чораҳоро меандешад», – изҳор дошт зимни боздид сафир.

Ба гуфтаи сарчашма, раиси Кумитаи ҷавонон, варзиш ва сайёҳии назди Ҳукумати ҶТ Маликшо Неъматов барои сӯҳбати пурмӯҳтаво аз сафир изҳори миннатдорӣ карда, зикр кард, ки бояд муносибатҳои дӯстона миёни халқҳои ҳар ду кишвар, ки ба санҷишҳои чандинасраи таърих тоб овардаанд, аз нав бо вусъати тоза рушд ёбанд.

Дар анҷоми мулоқот Ш.Шоисломов ва М.Неъматов ба саволҳои ҳозирин ҷавоб дода, сипас филми ҳуҷҷатии филмбардорони ӯзбек бо номи «Соли 2008 – Соли ҷавонон дар Ӯзбекистон» намоиш дода шуд.

Душанбе. 26-уми июни 2008с. «ОИ Азия-Плюс»



– 7 ташкилоти ғайридавлатӣ ва ғайритиҷоратии Тоҷикистон ғолиби озмуни Бонки ҷаҳонӣ оид ба татбиқи барномаи рушди ҷомеаи шаҳрвандӣ барои соли 2008 гардиданд, ки ҷиҳати амалисозии он 35 000 доллари амрикоӣ ҷудо гардида буд.

Аз намояндагии Бонки ҷаҳонӣ (БҶ) дар Тоҷикистон хабар доданд, ки соли ҷорӣ мавзӯи барнома ширкати ҷомеаро дар кори ҳифзи муҳити зист дар бар мегирифт. Бурсҳо ба маблағҳои аз 3400 то 7000 доллари амрикоӣ ихтисос дода шуда буданд.

Ташкилотҳои шаҳрҳои Душанбе, Хоруғ, Хуҷанд ва ноҳияҳои Ҷиргатолу Роштқалъа миёни ғолибони озмун ҷой доранд.

«Лоиҳаҳои интихобшуда ба ҳалли масоили экологӣ, ҳифзи муҳити зист ва инчунин ҷалби кӯдакони дорои имкони маҳдуд ба ҳаёти шоиста дар ҷомеа равона гардидаанд», – гуфта мешавад дар иттилоия бонк.

«Ба озмун 89 лоиҳа пешниҳод шуд ва интихоби онҳо ҷиҳати молиягузорӣ тибқи қоидаҳои БҶ барпо гашта, бо ҷаласаи Кумитаи ҷудокунии бурсҳо ва ширкати созмонҳои мададрасон ва намояндагони мақомоти шаҳрдории Душанбе анҷом ёфт», – изҳор доштанд дар намояндагии бонк.

Барномаи бурсҳои хурд аз ҷониби Бонки ҷаҳонӣ соли 1983 таҳия шудааст. Соли равон он номи Барномаи рушди ҷомеаи шаҳрвандиро гирифт. Аз соли 1998 то имрӯз Бонки ҷаҳонӣ дар Тоҷикистон ба маблағи беш аз 220 ҳазор доллари амрикоӣ бурсҳои хурд ҷудо кардааст.