Душанбе. 26-уми июни с.2008. ОИ «Азия-Плюс» – Дар ҷаласаи навбатии иҷлосияи чоруми Маҷлиси намояндагони Маҷлиси Олии (МН МО) ҶТ лоиҳаи «Дурнамои самтҳои асосии сиёсати пулию қарзии ҶТ барои соли 2008» якдилона тасдиқ гардид.

Ба гуфтаи раиси Бонки Миллии Тоҷикистон (БМТ) Шариф Раҳимзода, соли гузашта ҳаҷми маҷмӯи маҳслоти дохилӣ 12 млрд. 768 миллион сомониро ташкил додааст ва он нисбат ба соли 2006 7,8% афзудааст. Дар соли равон маҷмӯи маҳсулоти дохилӣ дар ҳаҷми 16 млрд. 380 млн. сомонӣ пешбинӣ шудааст, ки он нисбат ба соли гузашта 8% бештар аст.

Сатҳи таваррум дар соли 2007 19,7%-ро ташкил додааст, соли 2008 он бояд ба 15% баробар шавад (дар панҷ моҳи соли ҷорӣ он ба 6,8% баробар аст).

«Афзоиши нархҳо дар бозори ҷаҳонӣ ба нархҳои бозорҳои дохилии мо низ бетаъсир нахоҳад монд», – идома дод Ш.Раҳимзода ва афзуд, ки соли гузашта нархҳои маҳсулоти ғизоӣ 25%, маҳсулоти ғайриистеъмолӣ 7,5% ва хизматрасониҳои пулакӣ ба аҳолӣ 17% боло рафтаанд.

Раиси БМТ изҳор дошт, ки қурби асъори миллӣ соли гузашта 1,1% поин фаромада, дар панҷ моҳи соли равон қурби расмии он 1% афзудааст.

Ш.Раҳимзода илова намуд, ки тамоми муомилоти савдо бояд бо пули миллӣ анҷом гирад. «Аз ин рӯ, дар ҳамдастӣ бо мақомоти ҳифзи ҳуқуқ дар ин бобат чораҳо андешида мешаванд», – зикр кард ӯ.

Душанбе. 9-уми июн. ОИ «Азия-Плюс» – Чанд рӯз қабл нашриёти «Ирфон» китоби тозаи профессор Мансур Бобохонов «Сухан дар бораи тоҷикон»-ро ба табъ расонид, ки дар он мақолаҳо, гузоришот ва баромадҳо перомуни масоили муҳими тоҷикони хориҷи кишвар ҷамъоварӣ шудаанд. Маводи мазкур бо забони русӣ ва тоҷикӣ дар матбуоти даврӣ ва гузоришоти конфронсҳои илмии минтақавӣ ва байнулмилалӣ аз солҳои 60—уми асри ХХ то соли 2007 ба чоп расидаанд. Китоб аз ду қисм иборат аст. Қисми аввал беш аз 20 мақола ва гузоришоти муаллиф, мусоҳибаи рӯзноманигорони варзида Шодӣ Шокирзода, Фотеҳи Абдулло, Иброҳим Шукуров ва Чумъахони Саидро бо забони тоҷикӣ перомуни фолклори тоҷикони Афғонистон, қайдҳои сафарӣ аз ин кишвар, аз ҷумла дидор бо роҳбари маркази фарҳангии Носири Хисрав, шоир ва пешвои сиёсӣ Саид Мансур Нодириро дар бар мегирад. Ҳамчунин дар ин қисм номаҳои расмии муаллиф оид ба мушкилоти тоҷикони бурунмарзӣ ба роҳбарони ҷудогонаи муассисоти Тоҷикистон ва сарвари давлат ҷой дода шудааст. Ба қисми дуввум беш аз 10 мақолаи қаблан чопшуда ва тақризҳои олим дар бораи мушкилоти тоҷикон бо забони русӣ таҳти унвони «Тоҷикон дар Русия», «Диаспораи тоҷикон ва ватани таърихӣ», «Масоили муҳими тоҷикони ҷаҳон», «Ба Сибир аз пайи тоҷикон», «Муҳоҷирони Тоҷикистон дар Сибир» ва ҳамчунин ду посухи Маркази пажӯҳишгоҳи тоҷикон ва мардуми форсизабони ҷаҳони назди ДДМТ ба хулосаи комиссияи коршиносон бобати лоиҳаи Марказ ва ғайра ворид гаштаанд.

 

Маҷмӯа барои олимон, коршиносон, аспирантҳо, донишҷӯён ва ҳамчунин ба ҳамаи он касоне, ки ба масъалаҳои тоҷикони ҷаҳон таваҷҷӯҳ доранд, пешбинӣ гардидааст.

Душанбе. 9-уми июн. ОИ «Азия-Плюс» – Ҷамъияти Ҳилоли Аҳмари Тоҷикистон (ҶҲАТ) кӯмаки башардӯстонаи Амрикоро ба маблағи $850 ҳазор тақсим кард. Мадина Сайфиддинова, корманди шӯъбаи иттилооти ҶҲАТ ба ОИ «Азия-Плюс» хабар дод, ки ба беморхонаи ҷумҳуриявии касалиҳои сили Мачитони ноҳияи Ваҳдат аз ҳисоби кӯмаки башардӯстона кӯрпаҳо ва лавозимоти шустушӯ дода шудааст. Бино ба иттилои манбаъ, беморхона барои 700 нафар пешбинӣ шуда, айни замон дар он 286 нафар беморон табобат мегиранд. «Ҳамчунин ба таваллудхонаи ноҳияи Ваҳдат (либосҳо барои навзодон), шӯъбаҳои табобатии беморхонаи марказӣ, ихтиёриёни ҶҲАТ, аъзои кумитаи рушди деҳот, хонандагони синфҳои ибтидоӣ низ кӯмак расонида шуд, – зикр кард М.Сайфиддинова. – Кӯмак бо мақсади ёрӣ расонидан ва дастгирии волидайни беморон расонида мешавад». «Қисме аз кӯмаки башардӯстона ба беморхонаи касалиҳои сили ноҳияи Восеъ ва беморхонаи кӯдаконаи аксалиҳои сили шахри Душанбе дода мешавад, – гуфт ӯ. – Кӯмаки мазкур аз Амрико тавассути Ҷамъияти Салиби Сурхи Амрико дастрас гардидааст».

Душанбе. 9-уми июн. «Азия-Плюс» – Муддати як ҳафта мутахассисони Ҷумҳурии Исломии Эрон таҳти роҳбарии профессори Донишгоҳи тибби ҶИЭ Акрами Пуршамс бо фаъолияти марказҳои тадқиқоти бемориҳои меъдаву рӯда, гурда ва саратони ҶТ шинос шуданд. Бино ба иттилои Фотима Яқубова, сухангӯи Вазорати тандурустии ҶТ, ба ҳайат 4 нафар доктори эронӣ – мутахассисони Маркази тадқиқоти муҳити зисти донишгоҳ шомил буданд. Ба қавли ӯ, дар дидор бо муовини вазири тандурустии ҶТ Соҳибназар Раҳмонов масоили ҳамкории тарафайн низ мавриди баррасӣ қарор гирифтанд. «Ҳайати эронӣ аз Донишкадаи гастроэнтерологии Академияи улуми ҶТ, беморхонаи марказии ёрии таъҷилии пойтахт боздид карда, ҳамчунин бо ректори Донишгоҳи давлатии тиббии Тоҷикистон ба номи Абӯалӣ ибни Сино Убайдулло Қурбонов мулоқот карданд, – идома дод Ф.Яқубова. – Зимни дидор ҷонибҳо изҳори боварӣ карданд, ки мулоқотии мазкур ба рушди ҳамаҷонибаи ҳамкориҳо ва баланд бардоштани сатҳи донишу малакаи мутахассисони тоҷик дар Эрон заминаи боэътимод хоҳад гузошт».

Душанбе. 9-уми июн. ОИ «Азия-Плюс» – Бо мақсади дар таҷрибаи соҳаи тандурустӣ ҷорӣ сохтани бақайдгирии ҳодисаҳои таваллуд ва фавти кӯдакон мувофиқи меъёрҳои зиндазоӣ ва мурдазоӣ, аз 10 то 28-уми июн дар вилояти Хатлон ва ноҳияҳои тобеи марказ перомуни мавзӯи меъёрҳои зиндазоӣ семинарҳои омӯзишӣ гузаронида мешаванд. Чӣ тавре ки ба ОИ «Азия-Плюс» аз Вазорати тандурустии ҶТ хабар доданд, чорабиниҳои мазкур дар чаҳорчӯбаи амалисозии фармони вазири тандурустии ҶТ «Дар бораи тадриҷан гузаштани муассисаҳои тиббии Вазоарти тандурустии ҶТ ба меъёрҳои байнулмилалии қайди зиндазоӣ, ки Созмони ҷаҳонии беҳдошт тавсия додааст» гузаронида мешаванд. Бино ба иттилои манбаъ, семинарҳо ҳамчунин бо мақсади таъмини мувофиқати маълумот дар бораи таваллуд ва фавти кӯдакон дар давраи перинаталӣ, муайян кардани дахолат ба коҳиш додани фавти кӯдакон баргузор мегарданд. Бо барномаи омӯзишӣ мутахассисони ноҳияҳои Файзобод, Нуробод, Тавилдара, Тоҷикобод, Ҷиргатол, Данғара, Балҷувон ва Қумсангири вилояти Хатлон фаро гирифта мешаванд. «Гурӯҳҳои мақсаднокро момодояҳо ва духтурони бемориҳои занона, неонатологҳо, кормандони омори соҳа ва ҳамшираҳои шафқати бақайдгирандаи таваллуд ташкил хоҳанд дод», – афзуданд дар Вазорати тандурустӣ.