Конибодом. 17-уми июл. ОИ «Азия-Плюс» – Ба буҷаи Конибодом маблағҳои иловагӣ ворид нагардиданд. Бо вуҷуди он ки дар маҷмӯъ истеҳсоли маҳсулот 107,4 фоизро ташкил дода бошад ҳам, ба иллати аз фаъолият бозмондани се корхонаи саноатии шаҳр истеҳсоли маҳсулоти дигар ба маблағи 3 млн. 483 ҳазор сомонӣ таъмин нагардида, буҷаи маҳаллӣ ба миқдори 417,9 ҳазор сомонӣ зарар дидааст.

«Ҷамъияти саҳомии (ҶС) «Ассор» (истеҳсоли равғани пахта») бо сабаби набудани ашёи хом, ҶС «Ирам» (истеҳсоли маҳсулоти консерваву равғани пахта) ба иллати иваз шудани раиси корхона ва корхонаи муштараки «Равот-Адрия» (истеҳсоли машрубот) бо сабаби адами маблағҳои гардон аз фаъолият бозмондаанд», – иттилоъ доданд ба ОИ «Азия-Плюс» аз шӯъбаи саноати мақомоти шаҳрдорӣ.

«Мақомоти роҳбарии шаҳр ҷиҳати ҳалли мушкилоти ин се корхона ва ҳамчунин коҳиши маблағи қарзҳои корхонаҳои саноатӣ, ки 20 ҳазор сомонӣ

 

аз музди меҳнат ва 304 ҳазор сомонӣ аз андоз иборатанд, тамоми чораҳоро меандешад», – идома дод сарчашма ва афзуд, ки қарзҳои андоз беш аз 157 ҳазор сомонӣ ба ҶС «Ҳабиб» (корхонаи пахтатозакунӣ) ва 98 ҳазор сомонӣ ба ҶС «Конибодом» (комбинати консерва) рост меоянд.

Реклама на asia+

Кӯлоб. 17-уми июл. ОИ «Азия-Плюс» – Чанде қабл дар деҳаи Диндӯстони ноҳияи Мӯъминобод коргоҳи хизматрасонии мошинҳову тракторҳо, ки дар қарни гузашта бо исми МТС маъруф буд, ташкил гардид. Мувофиқи фармоиш он ба хоҷагиҳои деҳқонӣ ва иҷоракорони хусусӣ дар қаламрави ноҳия хизматрасонии гуногун тавассути техникаи кишоварзиро пешниҳод менамояд.

Роҳбари коргоҳ Ҷамшед Мирзоев ба ОИ «Азия-Плюс» изҳор дошт, ки «зиндагӣ маҷбур сохт, ки гузаштаро ба хотир орем».

Ба гуфтаи ӯ, соҳибони хусусии техникаҳои кишоварзӣ корҳоро бо қиммати хеле гарон иҷро мекунанд, ки он боиси аз кор дар замин дилхунук гаштани деҳқонон мегардад ва фоида хароҷотро намепӯшонад.

«Мо барои ҷуфти як гектар замин 228 сомонӣ маблағ мегирем, ки ҳам барои мо ва ҳам кишоварзон қулай аст ва аллакай ба коргоҳ эҳтиёҷмандон муроҷиат мекунанд», – идома дод ӯ.

Коргоҳ аз ҷониби собиқ механизаторон, соҳибкорон ва тоҷирон таъсис ёфта, дорои 10 техникаи кишоварзӣ аст.

«Мо ният дорем, ки комбайнҳои ғалладарави пуриқтидор дастрас намоем, зеро 70 фоизи ҳосили зироати ғалладона бо сабаби баланд будани арзиши техникаҳои ҳосилғундори хусусӣ ба таври дастӣ ҷамъоварӣ карда мешавад», – афзуд Ҷ.Мирзоев.

Реклама на asia+

Панҷакент. 17-уми июл. ОИ «Азия-Плюс» – Бо дастгирии лоиҳаи Агроаксияи Олмон «Беҳтарсозии амнияти ғизоии хонаводаҳо дар водии Зарафшон» дар деҳаи Урметани ноҳияи Айни, ки 7 ҳазор аҳолӣ дорад, маркази компютерии шабакаи ҷаҳонии Интернет ифтитоҳ гардид.

Ба гуфтаи мутахассиси рушди ҷамоатҳои лоиҳа Майя Аҳмедова, дар доираи татбиқи лоиҳаи мазкур ба хазинаи Кумитаи рушди деҳа аз ҳисоби баргардонии пардохти маблағҳо барои харидории тухмии босифату таҷҳизоти истеҳсол ва коркарди маҳсулоти кишоварзӣ беш аз 16 ҳазор сомонӣ ҷамъоварӣ карда шуд.

«Моҳи декабри сои 2007 дар маҷлиси умумӣ қарор шуд, ки қисме аз ин маблағро ҷиҳати ташкил додани маркази Интернет равона созем, – идома дод М.Аҳмедова. – Акнун сокинони деҳа метавонанд аз хизматрасониҳои почтаи электронии Интернет бемалол истифода бурда, ҳамчунин тарзи кор бо компютерро азхуд намоянд.

Реклама на asia+

Душанбе. 17-уми июл. ОИ «Азия-Плюс – Коршиносони Иттиҳоди Давлатҳои Мустақил (ИДМ) ба лоиҳаи тартиби эътирофи санадҳои омодасозии ҳайати корӣ дар соҳаи таъмини бехатарӣ дар саноат, санҷиш ва гувоҳнома додан ба кормандон тағйироту илова ворид сохта, тавофуқ ҳосил карданд.

Мушовири дафтари матбуоти Кумитаи иҷроияи ИДМ Мария Гутсало изҳор дошт, дар санад аз ҷониби ҳамаи кишварҳои узви ИДМ риояи меъёрҳои мувофиқашудаи таъмини бехатарии кор дар саноат, тартиби иҷозати коргарон ба кор, истифодаи механизмҳо ва таҷҳизот дар иншооти истеҳсолии хатарнок пешбинӣ шудааст.

Ба гуфтаи ӯ, ҷонибҳо ӯхдадор мешаванд, ки санадҳои ҳамдигарро, ки аз тарафи мақомоти ваолатдори кишварҳо дода шудааст, эътироф намоянд ва зимни кор дар кишвари дигар мутахассиси дорои чунин санад бидуни тасдиқи сатҳи тахассусии худ ҳуқуқи кор карданро соҳиб мешавад.

«Дар ҳамин ҳол, муқаррароти ин созишнома ба мақомоти ваколатдори сатҳи миллии муайян кардани сатҳи тахассусии кормандон дахл надорад ва онҳо дар ин кор мустақилона амал мекунанд», – таъкид сохт М.Гутсало.

Пас аз мувофиқасозии ниҳоӣ лоиҳа ба баррасии ҷаласаи сарони кишварҳои узви ИДМ пешниҳод мегардад.

Реклама на asia+

Хуҷанд. 17-уми июл. ОИ «Азия-Плюс» – Чаҳордаҳ ҳазор сокинони вилояти Суғд дар навбати гирифтани шиносномаи хориҷӣ номнавис шудаанд.

Дар нишасти матбуотӣ сардори Раёсати корҳои дохилии вилоят Абдураҳим Қаҳҳоров изҳор дошт, ки аввали соли равон 2 ҳазор дона ва сипас 4 ҳазор донаи дигар шиносномаҳои хориҷӣ дастрас гардида буданд.

Мавсуф қайд кард, ки ҳафтаи оянда аз вазорати хориҷии ҷумҳурӣ боз 12 ҳазор дона шиносномаи хориҷӣ ба вилоят оварда мешавад.

«Мувофиқи тартиб, пас аз супоридани ҳамаи ҳуҷҷатҳои зарурӣ бояд муддати 1 моҳ интизор шавад, – идома дод А.Қаҳҳоров. – Дар ҳолатҳои мавҷудияти сабабҳои асоснок, чун сафари хидматӣ, табобат ва таҳсил ин мӯҳлат метавонад то 10 рӯз кам карда шавад».

Реклама на asia+

Душанбе. 17-уми июл. ОИ «Азия-Плюс» – Дар нимсолаи аввали соли 2008 муомилоти савдои хориҷии Тоҷикистон бо дарназардошти нерӯи барқ ва гази табиӣ 2 млрд. 325,7 млн. доллари амрикоиро ташкил дод, ки ин нишондиҳанда мувофиқи маълумоти Кумитаи давлатии омори ҷумҳурӣ, дар муқоиса ба ҳамин давраи соли гузашта 24,3 фоиз зиёдтар аст.

Ба иттилои сарчашма, тавозуни савдо манфӣ буда, воридот нисбат ба содирот ду баробар ($745,9 млн.) бештар аст.

Содироти мол ба $789,9 млн. баробар буда, нисбат ба ҳамин давраи соли гузашта $53,5 млн. зиёд мебошад.

Воридоти мол $1 млрд. 535,8 миллионро ташкил додааст, ки нисбат ба давраи моҳҳои январ-июни соли 2007 $400,4 млн. бештар аст.

Тоҷикистон дар ин давра бо 11 кишварҳои узви Иттиҳоди Давлатҳои Мустақил (ИДМ) ва 79 давлатҳои хориҷи дур муносибати савдои хориҷӣ дошт. Дар муомилоти савдои хориҷӣ ба ҳиссаи мамлакатҳои узви ИДМ 43,3 фоиз ё тақрибан $1 млрд. 5,9 млн. ва ба ҳиссаи давлатҳои хориҷи дур 56,7 фоиз ё $319,7 млн. маблағ рост меояд.

Реклама на asia+

Душанбе. 17-уми июл. ОИ «Азия-Плюс» – Дар нимсолаи аввали соли 2008 сатҳи таваррум дар Тоҷикистон ба 8,28 фоиз расид.

Мувофиқи маълумоти Кумитаи давлатии омори Тоҷикистон, суръати миёнаи моҳонаи таваррум дар бахши истеъмолӣ 1,38 фоизро ташкил додааст ва ин дар ҳолест, ки ин нишондиҳанда соли гузашта ба 0,58 фоиз баробар буд.

Аз оғози соли ҷорӣ нархҳои маводи ғизоӣ 8,8 фоиз, маводи ғайриғизоӣ 2,6 фоиз ва хизматрасонии пулакӣ ба аҳолӣ 18,2 фоиз боло рафтаанд.

Ёдрас мекунем, ки 28-уми майи соли равон дар ҷаласаи ҳукумати ҷумҳурӣ лоиҳаи Дурнамои сиёсати молиявӣ ва қарзии Тоҷикистон барои соли 2008 маъқул шуморида шуд, ки тибқи он соли ҷорӣ нигоҳ доштани сатҳи таваррум ба миқдори 15 фоиз ва таъмини рушди истеҳсолот ба андозаи 7 фоиз пешбинӣ шудааст.

Реклама на asia+