Камчибек Тошиев, раиси КДАМ-и Қирғизистон имрӯз, 10-уми феврал, аз сӯйи Содир Жапаров, раисҷумҳури ин кишвар ба истеъфо фиристода шуд. Ба ҷойи Тошиев генерал-майор Ҷумгалбек Шабданбеков таъин шуд.
Хабаргузории “24.kg” навишт, ки фармони раисҷумҳури Қирғизистон дар бораи пеш аз муҳлат аз вазифаи муовини раиси Девони вазирон – раиси Кумитаи давлатии амнияти миллии Қирғизистон озод кардани Қимчибек Тошиев имзо шудааст.
Якҷо бо Тошиев, муовинҳои ӯ ҳам ба истеъфо фиристода шуданд.
Ба ҷойи Тошиев Ҷумгалбек Шабданбеков, ки то ин лаҳза сардори хадамоти 9-ум ва муовини раиси КДАМ-и Қирғизистон буд, таъин шудааст. Ӯ 55 сол дорад ва соли 2022 рутбаи генерал-майор гирифтааст. Номзадии ӯ барои тасдиқ ба парлумон ирсол шудааст.
Бояд гуфт, Қамчибек Тошиев аз “дӯстонии наздиктарин” ва ҳамақидаву ҳамсангари Содир Жапаров, раисҷумҳури Қирғизистон дониста мешавад. Ӯ якҷо бо Жапаров паси панҷараи додгоҳ рафтааст, дар озодии раисҷумҳури кунунӣ саҳми муассир доштааст ва аз рӯзи аввали сари қудрат омадани Жапаров дар паҳлӯи ӯ ва дар вазифаи раиси КДАМ будааст.
Чанде пештар дар филми “Раисҷумҳур”, ки ба давраи ҳукмронии Жапапов бахшида шуда буд, Тошиев аз корномаи раисҷумҳураш бо эҳсосот ва ифтихор нақл кардааст.
Чанеде пеш аз истеъфои Тошиев дар саҳифаҳои қирғизии шабакаҳои иҷтимоӣ наворе паҳн шуд, ки дар он ҳамакнун раиси пешини КДАМ мегӯяд, “дӯстӣ бо қудрату пул набояд чен карда шавад”.
Чанд лаҳза баъди эълони истеъфои Тошиев, расонаҳо Содир Жапаров сабаби ин истеъфоро шарҳ дод.
“Ман ин тасмимро пеш аз ҳама барои манфиати давлат, бо мақсади пешгирӣ аз ҷудоӣ дар ҷомеа, аз ҷумла миёни ниҳодҳои давлатӣ ва баръакс, барои тақвияти ваҳдат, гирифтам”, – гуфт Жапаров.
Худи Тошиев то ҳол дар бораи истеъфоаш расман ва ошкор чизе нагуфтааст.
Ёдовар мешавем, ки Тошиев дар музокироти Тоҷикистону Қирғизистон барои ҳалли баҳси марзӣ низ аз чеҳраҳои калидӣ буд. Ӯ аз ҷониби кишвари ҳамсоя роҳбарии ҳайати музокиротро ба зимма дошт вачанд маротиба ба Тоҷикистон сафар кардаву бо ҳамтои тоҷикаш мулоқот карда буд.
